Лінкі ўнівэрсальнага доступу

Ужо сёньня 16 ліпеня: працяг візыту Лукашэнкі ў Кітай, гадавіна падзелу хрысьціянства на каталіцтва і праваслаўе, дзень нараджэньня Вітаўта Вялікага


Вітаўт Вялікі

Вітаўт Вялікі

Пра падзеі і даты сёньня ў Беларусі, сьвеце, гісторыі

ПАДЗЕІ ДНЯ

Працягнецца афіцыйны візыт Аляксандра Лукашэнкі ў КНР.

У офісе партыі БНФ (вул. Чарнышэўскага, 3) — круглы стол, прысьвечаны крымінальнай справе супраць Аляксея Шчадрова, які ў вёсцы Аляксандраўка Шчучынскага раёну арганізаваў прытулак для бяздомных.

На барысаўскім гарадзкім стадыёне адбудзецца матч 2-га кваліфікацыйнага раўнду футбольнай Лігі чэмпіёнаў БАТЭ (Барысаў, Беларусь) — «Шахцёр» (Караганда, Казахстан). Пачатак у 19.00.

У Віцебску, у Мастацкім музэі, ў рамках фэстывалю «Славянскі базар» — выстава мастацкіх работ з фондаў Літаратурнага музэя Максіма Багдановіча.

У ЗША пачнецца традыцыйны Тыдзень паняволеных народаў, у часе якога грамадзкасьць і палітыкі выказваюць салідарнасьць з нацыямі, што церпяць прыгнёт камуністычных і іншых недэмакратычных урадаў. Традыцыя нарадзілася ў ЗША ў пяцідзесятыя пасьляваенныя гады і ад 1959 году ўзаконеная прэзыдэнтам Эйзэнхаўрам.


ГЭТЫ ДЗЕНЬ У ГІСТОРЫІ

16 ліпеня лічыцца днём пачатку падзелу агульнай хрысьціянскай царквы на каталіцкую і праваслаўную. У гэты дзень у 1054 годзе рымскі папа Леў ІХ наклаў анафэму на канстантынопальскага патрыярха Міхаіла.

1918 — у Екацерынбургу бальшавікі расстралялі расейскага цара Мікалая II разам зь ягонай сям’ёй.

1979 — прэзыдэнтам Іраку стаў Садам Хусэйн.



1990 — парлямэнт Украіны прыняў дэклярацыю аб дзяржаўным суверэнітэце Украінскай ССР.


У гэты дзень нарадзіліся

1350 г. — вялікі князь ВКЛ Вітаўт.



1872 — Раальд Амундсэн, нарвэскі палярнік, падарожнік і першаадкрывальнік.

1908 — Юрка Лявонны (сапраўднае прозьвішча Леанід Юркевіч), адзін з вялікай групы беларускіх літаратараў, якія былі расстраляныя ў чорны дзень беларускай літаратуры 29 кастрычніка 1937 году.

У гэты дзень памерлі

1957 — Янка Чарапук, беларускі грамадзка-палітычны дзяяч, арганізатар беларускага жыцьця ў Чыкага

1976 — Янка Станкевіч, беларускі мовазнавец, гісторык, палітычны дзяяч. Сярод іншага займаўся гісторыяй беларускіх кітабаў (кніг, пісаных беларускімі мусульманамі арабскім пісьмом), падрыхтаваў «Беларуска-расейскі (Вялікалітоўска-расейскі) слоўнік».

1985 — Генрых Бёль, нямецкі пісьменьнік, ляўрэат Нобэлеўскай прэміі па літаратуры

1990 — Мікалай Арэхва, дзеяч рэвалюцыйнага руху ў Заходняй Беларусі, гісторык.


ЦЫТАТА ДНЯ

Дзе сёньня мяжа паміж свабодай і няволяй? Дзе крытэр, каб адрозьніць вольнага чалавека ад нявольніка? Гэтая мяжа — не турма. Сёньня ў турме можна быць больш вольным, чымся «на волі». Мяжа паміж свабодай і няволяй у першую чаргу ў нас саміх.
Аўген Калубовіч

Паказаць камэнтары

XS
SM
MD
LG