Лінкі ўнівэрсальнага доступу

Беларусь пагоршыла пазыцыю ў рэйтынгу недзеяздольнасьці дзяржаваў


Дзіравы дзяржаўны сьцяг. Менск, архіўнае фота

Дзіравы дзяржаўны сьцяг. Менск, архіўнае фота

Рэйтынг недзеяздольнасьці дзяржаваў (Failed States Index) — індэкс, закліканы ацаніць няздольнасьць уладаў кантраляваць цэласнасьць тэрыторыі, а таксама дэмаграфічную, палітычную і эканамічную сытуацыю ў краіне. Падлічваецца і штогод публікуецца Амэрыканскім фондам міру і часопісам «Foreign Policy». Днямі быў абнародаваны даклад аб рэйтынгу недзеяздольнасьці дзяржаваў за 2012 год.

Паводле ацэнак, сытуацыя ў Беларусі ў сэнсе дзеяздольнасьці дзяржавы пагоршылася ў параўнаньні з мінулым годам — краіна перасунулася з 85-га на 81-е месца (усяго ў рэйтынгу ацэньваюцца 177 краінаў). Але пры гэтым паказьнік фактычна вярнуўся на ўзровень папярэдніх гадоў: у 2010-м Беларусь займала ў рэйтынгу 83-е месца, у 2009-м — 82-е.

Сярод паказьнікаў, паводле якіх робіцца ацэнка, — дэмаграфічны ціск (вызначаецца шчыльнасьцю насельніцтва і наяўнасьцю этнічных канфліктаў), узровень эміграцыі, эканамічная сытуацыя, канфлікты ў сілавых структурах і эліце, легітымнасьць дзяржавы, ступень прыхільнасьці да выкананьня законаў і захаваньня правоў чалавека, рызыкі замежнага ўмяшаньня ў палітычныя і ваенныя канфлікты, а таксама залежнасьць ад вонкавага фінансаваньня.

Беларусь мае кепскія ацэнкі што да легітымнасьці дзяржавы, захаваньня правоў чалавека і вяршэнства закону, падзелу ўнутры эліты і рызыкаў зьнешняга ўмяшаньня.

Сёлета пяцёрку самых недзеяздольных дзяржаваў склалі Самалі, Конга, Судан і Паўднёвы Судан, а таксама Чад. У той жа час як найбольш стабільныя краіны былі адзначаныя Фінляндыя, Швэцыя, Нарвэгія, Швэйцарыя і Данія.


Паводле аўтараў рэйтынгу, Беларусь — менш дзеяздольная дзяржава, чым усе яе суседзі, акрамя Расеі, зь якой Беларусь, што да дзеяздольнасьці, прыкладна на аднолькавым узроўні.

  • 16x9 Image

    Юры Дракахруст

    Журналіст. Нарадзіўся ў 1960 г. Зь 2000 г. — супрацоўнік Беларускай рэдакцыі Радыё Свабода ў Празе. Ляўрэат прэміі Беларускай асацыяцыі журналістаў (1996).
     

XS
SM
MD
LG