Лінкі ўнівэрсальнага доступу

logo-print

Гандаль унутры Мытнага саюзу ўпаў на 10 працэнтаў


Рэчаіснасьць перакрэсьлівае аптымістычныя заявы ініцыятараў стварэньня Мытнага саюзу аб новых рынках збыту для беларускіх тавараў.

Затаваранасьць складоў прадпрыемстваў Беларусі знайшла сваё адлюстраваньне і ў статыстыцы гандлю паміж сябрамі Мытнага саюзу — Расеяй, Беларусьсю і Казахстанам.

За 4 месяцы зьнешні гандаль Мытнага саюзу зьнізіўся на 1,3%, узаемны гандаль упаў на 10%, паведамляе агенцтва Finmarket.

У студзені-красавіку 2013 году аб’ём зьнешняга гандлю таварамі дзяржаў-сябраў Мытнага саюзу з трэцімі краінамі склаў 297,1 мільярда даляраў. У параўнаньні з аналягічным пэрыядам 2012 году аб’ём зьнешняга гандлю паменшыўся на 1,3%, або на 4 мільярды даляраў, гаворыцца ў матэрыялах Эўразійскай эканамічнай камісіі.

У Беларусі за гэты час экспарт ўпаў на 35%, да 7,3 мільярда даляраў, імпарт вырас на 22,1%, да 6,2 мільярда даляраў.

Аб’ёмы ўзаемнага гандлю дзяржаў-сябраў Мытнага саюзу ў студзені-красавіку 2013 склалі 20,4 млрд даляраў. У параўнаньні з аналягічным пэрыядам 2012 году аб’ём узаемнага гандлю паменшыўся на 10%.

Паміж Расеяй і Беларусьсю ўзаемны гандаль паменшыўся на 15,5% і склаў 12,9 мільярда даляраў, паміж Беларусьсю і Казахстанам — абвал склаў 12,2%.
XS
SM
MD
LG