Лінкі ўнівэрсальнага доступу

Ужо сёньня, 13 чэрвеня: У Гомелі ток-шоў «Будзьма», у Нью-Ёрку кінафэстываль Human Rights Watch


Лягатып грамадзкай кампаніі "Будзьма беларусамі"

Лягатып грамадзкай кампаніі "Будзьма беларусамі"

Падзеі і даты гэтага дня ў Беларусі, сьвеце, гісторыі.


ПАДЗЕІ ДНЯ

У Гомелі ў гатэлі «Замкавы» пройдзе чарговае ток-шоў кампаніі «Будзьма беларусамі!» Размова на тэму — як прасоўваць свой культурніцкі праект.

У сталічнай кнігарні логвінаЎ адбудзецца прэзэнтацыя кнігі «Усьмешка жалобнай каралевы», раману —фантазіі Сержука Мінскевіча паводле беларускай міталёгіі. Аўтар таксама зайграе на гітары.

У Менску адкрываецца чарговая сэсія Парлямэнцкага сходу Беларусі і Расеі.

У Маскве пачнецца двухдзённы грамадзянскі саміт Групы 20.У яе ўваходзяць 19 найбольш прамыслова разьвітых краінаў сьвету і Эўразьвяз.

У Нью-Ёрку адкрыецца фэстываль фільмаў праваабарончай тэматыкі Human Rights Watch, сярод прэм’ераў — фільм, прысьвечаны гурту Pussy Riot.

ДЗЕНЬ У ГІСТОРЫІ

1508 — паспалітае рушэньне ВКЛ выйшла зь Ліды для дзеяньняў супраць маскоўскіх войскаў.

1611 — войскі Рэчы Паспалітай пасьля амаль двухгадовай аблогі ўзялі Смаленск.

1908 — упершыню жанчыны прынялі ўдзел у Алімпійскіх гульнях сучаснасьці.

1941 — у Латвіі, Літве і Эстоніі, нядаўна далучаных да СССР, пачаліся масавыя дэпартацыі насельніцтва ў Сібір.

1966 — Ватыкан адмяніў «Індэкс забароненых кніг», уведзены ў 1557 годзе.

2009 — у Беларусі ўпершыню праведзеная апэрацыя перасадкі ныркі дзіцяці ад яго сваякоў.

У гэты дзень нарадзіліся:

1702 — Міхал Казімір Радзівіл «Рыбанька», вялікалітоўскі дзяржаўны дзяяч, мэцэнат.

1834 — Канстанцін Вераніцын, аўтар паэмы «Тарас на Парнасе».

1928 — Джон Нэш, адзін са стваральнікаў тэорыі гульняў, ляўрэат Нобэлеўскай прэміі ў эканоміцы.

1944 — Пан Гі Мун, паўднёвакарэйскі дыплямат, цяперашні генэральны сакратар ААН.

У гэта дзень памерлі:

1231 — Антоні Падуанскі, партугальскі францысканец, тэоляг, каталіцкі сьвяты.

1943 — Юльян Саковіч, беларускі грамадзка-палітычны дзяяч.

1965 — Марцін Бубер, нямецка-габрэйскі філёзаф.

1971 — Сяргей Прытыцкі, палітычны дзяяч Заходняй Беларусі і БССР, лідэр КПЗБ.

ЦЫТАТА НА ПАМЯЦЬ

Памысліў я тады нямнога:
Што за шайтан Парнас такі?
Пусьціўся я проста той дарогай,
Узяўшы ў рукі добры кій.
Прайшоў вёрст дзевяць той дарогай,
Аж бачу я — гара стаіць,
А пад гарой народу многа,
Як бы кірмаш які кішыць.
Прыйшоў я бліжэй, што за ліха:
Народ ня просты, ўсё паны.
Хто дужа шпарка, хто паціху,
Усе лезуць на гару яны
І, як у школе, галасуюць,
Гатоў адзін другого з’есьць,
Бо кожны морду ўперад суець,
Каб першым на гару ўзлезьць.

З паэмы «Тарас на Парнасе»
XS
SM
MD
LG