Лінкі ўнівэрсальнага доступу

У Ганконгу на 67 годзе жыцьця мужчына высьветліў, што ён — жанчына


У Ганконгу лекары сутыкнуліся зь незвычайным пацыентам: 66-гадовы мужчына, які паскардзіўся на боль у страўніку, ніяк не чакаў, што ўсё сваё жыцьцё ён быў жанчынай.

А яго дыягназ — кіста яечніка, адзначае Hong Kong Medical Journal.

Паведамляецца, што пацыентка расла сіратой, палавой сталасьці яна дасягнула ва ўзросьце 10 гадоў. Лекары выявілі, што яна перанесла два рэдкія генэтычныя захворваньні, адно зь іх — сындром Шарашэўскага-Тэрнэра. Па статыстыцы, гэты сындром уласьцівы адной на дзьве тысячы нованароджаных дзяўчынак, ён зьяўляецца наступствам храмасомнай паталёгіі . Парушэньне фармаваньня палавых залоз пры сындроме Тэрнера абумоўленае адсутнасьцю або структурнымі дэфэктамі адной палавой храмасомы (X-храмасомы). Звычайна жанчыны, якія маюць гэтую паталёгію, ня здольныя нараджаць дзяцей, нават нягледзячы на лячэньне жаночымі гармонамі.

Акрамя гэтага сындрому, кітаянка віетнамскага паходжаньня пакутуе на прыроджаную гіперплазію кары наднырачнікаў, што прыводзіць да павелічэньня долі мужчынскіх гармонаў. Гэта захворваньне назіраецца ў аднаго зь 15 тысяч дзяцей. Паталёгія выяўляецца ў раньнім ці няправільным разьвіцьці фізіялёгіі мужчынскага арганізму.

«Цалкам магчыма, што калі б не велізарная кіста яечніка, асаблівасьць арганізму гэтай жанчыны так бы і засталася недасьледаванай», — адзначаюць аўтары навуковага артыкулу. Гэта шосты выпадак у гісторыі, калі ў аднаго чалавека зафіксаваныя абодва гэтыя захворваньні. У дакладзе лекары адзначылі, што 66-гадовая жанчына будзе і далей жыць жыцьцём мужчыны. Магчыма і тое, што ў хуткім часе ёй мэдычным спосабам павялічаць долю тэстастэрону ў арганізьме.
XS
SM
MD
LG