Лінкі ўнівэрсальнага доступу

Фэст у Мілавідах спынілі супрацоўнікі ДАІ


У Мілавідах Баранавіцкага раёну адбыўся фэст у гонар 150-годзьдзя найбуйнейшай бітвы паўстаньня 1863 году.

У фэсьце ўзялі ўдзел беларускія мастакі, музыкі, грамадзка-палітычныя дзеячы, а таксама неабыякавыя да гісторыі людзі з розных гарадоў Беларусі. Мерапрыемства павінны былі ладзіць чыноўнікі з аддзелу культуры Баранавіцкага райвыканкаму, але яны ў прызначаны час не прыехалі.

Фэст пачаўся бязь іх. Выступалі прамоўцы. Людзі ўсклалі кветкі да каталіцкай капліцы і памятнага каменя, памаліліся і прасьпявалі гімн «Магутны Божа».

Удзельнікі памаліліся і засьпявалі «Магутны Божа»

Удзельнікі памаліліся і засьпявалі «Магутны Божа»



Але праз паўгадзіны прыехалі супрацоўнікі ДАІ. Яны заявілі, што тут нельга спыняць аўтамабілі, і папярэдзілі, што калі праз 5 хвілін тыя ня зьедуць, на кіроўцаў складуць пратаколы.

Даішнікі і чалавек у цывільным спыняюць мерапрыемства

Даішнікі і чалавек у цывільным спыняюць мерапрыемства



Арганізатар мерапрыемства, баранавіцкі грамадзкі актывіст Віктар Сырыца прапанаваў працягнуць фэст на сядзібе Таварыства беларускай мовы ў вёсцы Русіна, куды ўсе і накіраваліся.

У Русіне адбылася канфэрэнцыя, прысьвечаная паўстаньню 1863 году. Выступілі гісторыкі, краязнаўцы, палітыкі. Адзін з арганізатараў фэсту Віктар Сырыца сказаў:

«Няпроста нам было арганізаваць гэты фэст, таму што цяперашнія ўлады робяць усё, каб замоўчваць Каліноўскага, замоўчваць Мілавідзкую бітву. Двойчы нам адмовілі ў правядзеньні Мілавідзкага фэсту. Папярэдняя згода была ад праваслаўнай царквы аб паніхідзе ў памяць палеглых у час паўстаньня. Але потым нам паведамілі, што вышэйшае кіраўніцтва праваслаўнай царквы не блаславіла гэта. Зьнікла мэмарыяльная шыльда зь Мілавідзкай школы — пра тое, што яна носіць імя Аляксандра Лянкевіча, кіраўніка паўстанцаў у Мілавідзкай бітве. Я ведаю, што зьнікла шыльда і ў Менску на вуліцы Кастуся Каліноўскага, у Гародні. Вось так сёньня замоўчваецца праўда пра паўстаньне Кастуся Каліноўскага».

Рыцары пасьля выступу

Рыцары пасьля выступу



Кіраўнік партыі БНФ Аляксей Янукевіч выказаў думку, што адсутнасьць гістарычнай памяці вядзе да страты сувэрэнітэту Беларусі:

«Мы бачым, што хоць і ёсьць беларуская дзяржава, але яна не беларуская нацыянальная дзяржава. Улады меліся прыехаць ушанаваць паўстанцаў у Мілавідах, аднак яны не зьявіліся там. Улада ня хоча, каб беларусы былі нацыянальна сьвядомыя. Больш за тое, мы бачым, што гэтая ўлада загульваецца ў інтэграцыйныя гульні з Крамлём. Дамовіліся аб тым, што расейскія зьнішчальнікі вернуцца ў Беларусь, ёсьць вялікая небясьпека, што ў 2015 годзе будзе падпісаны Эўразійскі зьвяз, які ў Крамлі бачаць як аднаўленьне савецкай імпэрыі».

Барды Зьміцер Бартосік (зьлева) і Віктар Шалкевіч

Барды Зьміцер Бартосік (зьлева) і Віктар Шалкевіч



Пасьля выступленьняў гісторыкаў і палітыкаў для прысутных гралі барды Зьміцер Бартосік і Віктар Шалкевіч, якіх у час канфэрэнцыі ўбралі ў шляхецкія строі ХІХ стагодзьдзя. Быў таксама выступ рыцараў з баранавіцкага клюбу. Прысутныя пачаставаліся «паўстанцкай» кашай, паспаборнічалі ў віктарыне, напісалі паштоўкі з выявамі Кастуся Каліноўскага палітвязьням.

Мілавідзкая бітва адбылася 22 траўня (3 чэрвеня) 1863 году паміж рэгулярнымі царскімі войскамі і беларускімі паўстанцамі. У выніку бітвы расейскае войска мусіла адступіць, а паўстанцы працягнулі змаганьне ў лясах.

Паказаць камэнтары

XS
SM
MD
LG