Лінкі ўнівэрсальнага доступу

У Эўрапарлямэнце вывучаюць даклад Палецкіса


У Брусэлі пачалося пасяджэньне Камітэту па замежных справах Эўрапарлямэнту, на якім у першым чытаньні будзе разгледжаная справаздача дакладчыка па Беларусі Юстаса Палецкіса, падрыхтаваная для Эўракамісіі, Рады Эўразьвязу і Службы зьнешніх дзеяньняў Эўракамісіі.

Як паведаміў Палецкіс БелаПАН на мінулым тыдні, пасьля абмеркаваньня на пасяджэньні камітэту ў дакумэнт можна будзе ўносіць папраўкі і прапановы. У жніўні камітэт разгледзіць даклад у другім чытаньні, а ў верасьні ён будзе вынесены на абмеркаваньне пленарнай сэсіі Эўрапарлямэнту.

Даклад быў падрыхтаваны па выніках візыту Юстаса Палецкіса ў Менск 18–21 сакавіка, Спадар Палецкіс сустрэўся тады з афіцыйнымі асобамі і прадстаўнікамі грамадзянскай супольнасьці Беларусі.

Дакумэнт выклікаў у Беларусі неадназначную рэакцыю. Прадстаўнікі апазыцыі і праваабаронцы абурыліся, што ў ім сказана пра паляпшэньне сытуацыі з правамі чалавека ў краіне ў 2012 годзе.

Сам аўтар дакладу сьцьвярджае, што такую выснову ён зрабіў на падставе інфармацыі, разьмешчанай на праваабарончым сайце spring96.org, дзе паведамлялася, што ў 2012 годзе ў Беларусі было зафіксавана ў тры разы менш рэпрэсіяў, арыштаў, затрыманьняў і ператрусаў, чым у 2011 годзе.

Падчас онлайн-канфэрэнцыі на сайце Радыё Свабода 24 траўня Палецкіс прызнаў, што фармулёўка пра «паляпшэньне сытуацыі з правамі чалавека» ў справаздачы няўдалая і будзе зьмененая:

«Так, я лічу, што гэтая фармулёўка атрымалася няўдалай, недакладнай. Гэта адбылося таму, што даводзілася скарачаць вялікі тэкст, і там падаваліся дадзеныя на аснове назіраньняў „Вясны“, што ўсё ж колькасьць рэпрэсіяў зьменшылася, што не было вынесена ніводнага сьмяротнага прысуду, хоць раней вынесеныя прыводзіліся ў выкананьне. Згодзен, з нагоды таго, што ў гэтым годзе назіраецца паляпшэньне — фармулёўка няўдалая, і яна будзе выпраўленая і мной, і маімі калегамі», — сказаў літоўскі эўрадэпутат.
XS
SM
MD
LG