Лінкі ўнівэрсальнага доступу

Цана на ўчасткі ў раёне кітайскага тэхнапарку ўпала ўтрая


Мітынг пратэсту дачнікаў супраць будаўніцтва кітайскага тэхнапарку. Архіўнае фота

Мітынг пратэсту дачнікаў супраць будаўніцтва кітайскага тэхнапарку. Архіўнае фота

Смалявіцкія дачнікі, чые ўчасткі трапілі на тэрыторыю патэнцыйнай забудовы кітайскага тэхнапарку, памалу іх пазбываюцца.

«Яшчэ год-паўтара таму ўчасткі прадаваліся па стабільнай цане — тысяча даляраў за сотку. Участак у 10 сотак прадавалі за 10 тысяч. А цяпер цяжка ўжо прадаць за 3–4 тысячы, — кажа дачніца Аксана Зелянеўская.

«Участак з фундамэнтам, глыбокім, надзейным ніхто ня хоча за 13 тысяч браць», — скардзіцца Аксана. А тыя, хто купляе за бесцань, спадзяюцца на тое, што парк не адбудзецца.

Грамадзкія слуханьні па праекце генпляну будоўлі Кітайска-беларускага індустрыяльнага парку завершаныя. Пратакол апублікаваны на сайце смалявіцкага выканкаму.

«Большасьць выказаных меркаваньняў выказваюць згоду з будаўніцтвам аб’екта», — сьцьвярджаюць чыноўнікі смалявіцкага выканкаму.

Сам генэральны плян ужо гатовы і накіраваны ў Савет міністраў. Пра гэта паведаміў прадстаўнік адміністрацыі Кітайска-беларускага індустрыяльнага парку Юры Шылін.

Пра дэталі зьменаў у пляне ён распавядаць ня хоча, бо дакумэнт яшчэ не зацьверджаны. Але яшчэ два месяцы таму прадстаўнік Мінэканомікі Кірыл Карацееў паведамляў, што для распрацоўкі генпляну трэба болей часу і каля 500 тысяч даляраў.

Цяпер Кірыл Карацеў заняў пасаду першага намесьніка генэральнага дырэктара кітайска-беларускага СЗАТ «Кампанія па разьвіцьці індустрыяльнага парку». 60% у ёй належаць ААТ «Кітайская карпарацыя інжынірынгу САМС», а 40% — беларускай дзяржаве.

Ці сапраўды людзі пагадзіліся з пабудовай парку на 80 квадратных кілямэтраў, у якім будуць жыць 155 тысяч чалавек?

Паводле афіцыйна апублікаванай выпіскі з пратаколу грамадзкага абмеркаваньня ад 29 красавіка, за будоўлю парку выказаліся 702 чалавекі, супраць — 509.

«Супраць» выказваюцца дачнікі і менчукі, а «за» — жыхары Смалявічаў, — тлумачыць актывістка-дачніца Аксана Зелянеўская. Яна распавядае, што чыноўнікі смалявіцкага выканкаму ходзяць зьбіраць подпісы «са сваіх».

Зелянеўская скардзіцца, што грамадзкія слуханьні прызначаліся ў працоўны час: людзі проста не змаглі на іх прысутнічаць. Да таго ж яна кажа, што каля 280 подпісаў жыхароў пасёлку Сокал супраць будоўлі парку не ўлічылі. А іх публічна перадавалі ў прэзыдыюм 17 красавіка.

А яшчэ на тэрыторыі забудовы два магільнікі зь сібірскай язвай!
Нязгоду з высноваю аўтараў пратаколу пацьвярджаюць і эколягі. Грамадзкая арганізацыя «Экадом» накіравала ў Смалявіцкі райвыканкам зварот з патрабаваньнем перагледзець высновы камісіі. На думку «зялёных», яны цалкам супярэчаць таму, што адбывалася на грамадзкіх слуханьнях, а «камэнтары, выступы супраць рэалізацыі праекту... засталіся не заўважанымі камісіяй і ніяк не былі ўлічаныя ў пратаколе».

Турбуе дачнікаў усё адразу: і тое, што будуць адбіраць участкі, і тое, што будучыя прадпрыемствы пашкодзяць экалёгіі.

«А яшчэ на тэрыторыі забудовы два магільнікі зь сібірскай язвай! — кажа Зелянеўская. — Пра гэта гаварылі на адным з пасяджэньняў грамадзкіх слуханьняў.

Адміністрацыя парку абяцае, што дачныя ўчасткі адбіраць ня будуць. «Але там ёсьць яшчэ адзін пункт, — кажа Зелянеўская. — Смалявіцкі выканкам можа адбіраць землі пад дзяржаўныя патрэбы. Хай нам паабяцаюць, што гэтага ня будзе».

Шылін сьцьвярджае, што забіраць у людзей дачныя ўчасткі забараніў сам прэзыдэнт адпаведным указам.

Дзяржава абяцае, што праект кітайскага тэхнапарку надзвычай выгадны для Беларусі. Прыцягваюць туды кампаніі, абяцаючы «просты доступ да рынкаў Адзінай эканамічнай прасторы, Эўропы і СНД», надзвычайныя падатковыя ільготы. Аднак вялікага ажыятажу не назіраецца.

Яшчэ год таму кітайскі бок заяўляў пра пляны ўкласьці ў будоўлю парку 56 млрд даляраў. Кітайская кампанія Chery нібыта плянавала пабудаваць тут аўтамабільны завод.

Усе праекты ў рамках закону. Ёсьць умовы, на якіх будуць заводы будавацца і адкрывацца вытворчасьць.
Цяпер Адміністрацыя парку не наважваецца гаварыць, якія менавіта кампаніі гатовыя прыняць удзел. Шылін прыводзіць толькі некалькі прыкладаў: гэта латвійская кампанія Grindeks (вытворчасьць у сфэры біятэхналёгіяў і фармацэўтыкі), «Ассамедыка» (вытворчасьць мэдычных вырабаў). Кажа, што ёсьць шэраг пагадненьняў «Гарызонта» з азіяцкімі транснацыянальнымі кампаніямі, ZTE. Адна з чэскіх кампаніяў зьбіраецца разьмясьціць на тэрыторыі парку станкабудаўнічую вытворчасьць.

«Усе праекты ў рамках закону, — запэўнівае Шылін, калі ўздымаецца пытаньне пра тое, што такая вытворчасьць будзе шкодзіць экалёгіі. — Ёсьць умовы, на якіх будуць заводы будавацца і адкрывацца вытворчасьць».

Эколягі ў траўні завяршылі экспэртызу праекту. Ужо цяпер відавочныя значныя экалягічныя праблемы: інжынэрна-геалягічныя мерапрыемствы, якія мяркуецца правесьці на тэрыторыі парку, прывядуць да паступовай гібелі навакольных лясоў і водных рэсурсаў. Да таго ж патрабуецца высечы каля 2 800 гектараў элітнага лесу, а гэта парушыць экалягічнае асяродзьдзе Менску.

Аднак галоўная выснова эколягаў — інфармацыі, якая прадстаўленая грамадзкасьці, занадта мала, каб рабіць кваліфікаваныя высновы. Ня болей зьвестак льга знайсьці і ў афіцыйных дакумэнтах. Інвэставаць у праект нібыта пагадзіліся кітайскі Export-Import Bank і China Development Bank , паведамляе агенцтва Bloomberg. Аднак на запыты карэспандэнта гэтага агенцтва ніхто ў названых кампаніях не адказаў.

Кітай проста так грошай не дае, там ніякага альтруізму няма. Зьнешняя запазычанасьць Таджыкістану на 70% кітайская. Гэта пагроза нацыянальнай бясьпецы? Пагроза
«У нас тут кітайскі тэхнапарк будуецца на 80 квадратных кілямэтраў... — журналіст Радыё Свабода пачынае размову з кітаязнаўцам Канстанцінам Сыраежкіным.

«І сьцяг вам у рукі... — сьмяецца Сыраежкін, галоўны навуковы супрацоўнік Казахстанскага інстытуту стратэгічных дасьледаваньняў.

«Мы Кітай ніколі не прыцягвалі да сябе, — кажа ён. — Дурні падпісваюць мэмарандумы, а людзі, калі пачынаюць будаваць, пачынаюць лічыць. Як падлічылі, то прасьлязіліся. Спачатку эўфарыя, а калі справа даходзіць да фінансаваньня.... Гэта нявыгадна. Вы далёка ад Кітаю, таму ня ведаеце. Кітай проста так грошай не дае, там ніякага альтруізму няма. Вось я вам прыклад Таджыкістану прывяду. Зьнешняя запазычанасьць Таджыкістану на 70% кітайская. Гэта пагроза нацыянальнай бясьпецы? Пагроза».

«Мы ўсё ж спадзяемся, што парку ня будзе, — падсумоўвае дачніца Аксана Зелянеўская. — Ён быў бы проста катастрофай для рэгіёну».
XS
SM
MD
LG