Лінкі ўнівэрсальнага доступу

Рэвалюцыя ў справе камлёвых клетак — шанец супраць хваробаў


З тых часоў, як у 1996 годзе навукоўцам упершыню ўдалося клянаваць авечку Долі, біёлягі 15 гадоў безвынікова спрабавалі навучыцца клянаваць эмбрыянальныя камлёвыя клеткі з генэтычнага матэрыялу дарослага чалавека.

Пасьля мноства правалаў і аднаго «прарыву», які аказаўся махлярствам, гэтыя работы нарэшце ўвянчаліся посьпехам. Вынікі рэвалюцыйнай працы апублікаваныя ў часопісе Cell.

Для атрыманьня эмбрыянальных камлёвых клетак былі выкарыстаныя клеткі скуры дарослага чалавека. Іх ДНК навукоўцы змаглі ўкараніць у неапладнёную чалавечую яйцаклетку, зь якой папярэдне была выдаленая яе ўласная ДНК.

Да гэтага часу адзінай крыніцай эмбрыянальных камлёвых клетак былі чалавечыя эмбрыёны, што стварала этычныя перашкоды для дасьледаваньняў з гэтым матэрыялам.

Навукоўцам з унівэрсытэта штату Арэгон у ЗША ўпершыню ўдалося атрымаць эмбрыянальныя ствалавыя клеткі зь неапладнёнай яйцаклеткі, якая з этычнага пункту гледжаньня ня можа лічыцца «чалавечай істотай».

Эмбрыянальныя камлёвыя клеткі, здольныя разьвівацца ў любыя тканіны чалавечага арганізму, у пэрспэктыве могуць зрабіць вылечнымі многія безнадзейныя хваробы, уключаючы незваротныя пашкоджаньні сардэчнай мышцы пасьля інфаркту, расьсеяны склероз, хваробу Паркінсана і многія іншыя. Посьпех амэрыканскіх навукоўцаў можа адкрыць шлях дасьледаваньня ў тых кірунках, якія дагэтуль былі замарожаныя паводле этычных прычынаў.

Паказаць камэнтары

XS
SM
MD
LG