Лінкі ўнівэрсальнага доступу

На Радаўніцу беларусы змогуць наведаць бяз пропускаў могілкі, разьмешчаныя на забруджаных пасьля Чарнобылю тэрыторыях.

Дазвол на вольны ўезд сапраўдны да аўторка, на які прыпадае Радаўніца. Каб наведаць могілкі ў магілёўскай і гомельскай вобласьцях, на працягу наступных некалькіх дзён дастаткова будзе паказаць пасьведчаньне асобы і — калі вы на аўтамабілі — дакумэнты на транспартны сродак. Час знаходжаньня ў зоне абмежаваны 17-й гадзінай вечара.

Усе, хто будзе ўяжджаць у гэтыя раёны, атрымаюаць пісьмовую інфармацыю, датычную мераў засьцярогі і правілаў бясьпекі, у тым ліку правілаў паводзінаў ва ўмовах высокай радыяцыі.

У Чарнобыльскай зоне месьціцца каля 200 могілак. Кожны год іх прыяжджае наведаць каля 12 тысячаў людзей, якія былі вымушаныя пакінуць родныя мясьціны з-за чарнобыльскай катастрофы.

Праваслаўныя беларусы ў наступны аўторак будзе адзначаць Дзень памяці мёртвых — Радаўніцу. Гэтае традыцыйнае сьвята прыпадае на дзявяты дзень пасьля Вялікадня. Паколькі многім трэба наведаць некалькі могілак, людзі пачынаюць іх аб’езд за некалькі дзён.
XS
SM
MD
LG