Лінкі ўнівэрсальнага доступу

МАЗ і КАМАЗ гатовы да аб’яднаньня, якое Лукашэнка лічыць «бандыцкай акцыяй»


Менскі аўтамабільны завод

Менскі аўтамабільны завод

«Уся падрыхтоўчая праца па аб’яднаньні Менскага і Камскага аўтамабільных заводаў скончаная», — заявіў сёньня на прэсавай канфэрэнцыі ў Менску намесьнік генэральнага дырэктара МАЗа Дзьмітрый Караткевіч.

Адказваючы на пытаньне нашага радыё, ён таксама сказаў, што адпаведныя дакумэнты ўжо падрыхтаваныя і перададзеныя ва ўрад.

Намесьнік генэральнага дырэктара МАЗа даў зразумець, што рашэньне аб лёсе прадпрыемства будзе прымацца зь беларускага боку на высокім роўні:

«Скончаныя ўсе дакумэнтальныя падрыхтоўчыя працы. Ацэненыя актывы як МАЗа, так і КаМАЗа. Усе прапановы перададзеныя на ровень ураду. І менавіта на гэтым роўні будзе прынятае рашэньне наконт аб’яднаньня.

З пункту гледжаньня працы на зьнешніх рынках аб’яднаньне, натуральна, дазволіць нам выкарыстоўваць актывы абодвух прадпрыемстваў. Мы будзем карыстацца зборачнай вытворчасьцю КаМАЗа, КаМАЗ будзе карыстацца зборачнымі прадпрыемствамі МАЗа. І гэта, натуральна, скароціць выдаткі. Будзе магчымасьць аптымізаваць выдаткі на стварэньне новых зборачных вытворчасьцяў».

Так бачаць сытуацыю вытворцы ў Менску. Расея таксама настойвае на аб’яднаньні і публічна называе гэты праект адным з прыярытэтаў сваёй інтэграцыйнай палітыкі. Беларусь то пагаджаецца на аб’яднаньне, то катэгарычна адмаўляецца ад зьліцьця. Апошнім разам катэгарычна супраць гэтага праекту выступіў Аляксандар Лукашэнка:

«Ня ведаю, як там ва ўрадзе рашаецца пытаньне. Але гэта ня іх сфэра. Усё роўна прыйдуць да прэзыдэнта. Што мы атрымаем ад гэтага аб’яднаньня, акцыянаваньня? А яшчэ і перадай за бясцэнак акцыі МАЗа.

Што мы атрымаем? Рынкі? Яны ў нас ёсьць, і яны ў нас агульныя. І мы не саступаем па якасьці, па цане прадукцыі, якую выпускае сёньня будучы акцыянэр. Я пытаюся: колькі вы ўкладзяце ў мадэрнізацыю МАЗа, калі вы сюды прыйшлі? Мне адказваюць: грошай няма. Я — прэзыдэнт Беларусі. І я на гэтую бандыцкую акцыю, інакш і не назавеш, не пайду».

Між тым сытуацыя ў Расеі з попытам на беларускія аўто зьмяняецца. Гэта прызнаў і Дзьмітрый Караткевіч:

«Напрыканцы мінулага году Расея перайшла на новыя экалягічныя стандарты — „Эўра-4“. І гэта пацягнула за сабою насьцярожанасьць спажыўцоў, бо пакуль няма рамонтнай базы, не хапае запасных частках, якаснага маторнага паліва, каб забясьпечыць гэтыя нормы. У сувязі з гэтым панізіўся попыт, што, у сваю чаргу, і выклікала праблемы з рэалізацыяй нашай прадукцыі».

На Расейскую Фэдэрацыю ў агульных пастаўках БелАЗаў прыпадае 64% усёй прадукцыі. І гэта пры ўсіх нашых спробах знайсьці альтэрнатыўныя рынкі. А на расейскім рынку попыт падае, — прызнаў намесьнік генэральнага дырэктара прадпрыемства Кірыл Казачэнка:

«Нашы аналітыкі пакуль ня бачаць вялікага прагрэсу. Папярэдне мы разьлічвалі, што ў другім паўгодзьдзі будзе рост цэнаў на вугаль і руды. Але гэтага не адбываецца. І гэта адпаведна мы бачым па попыце. Таму цяпер мы вымушаныя ісьці на кантракты з доўгімі адтэрміноўкамі плацяжоў».
Многія беларускія тавары, у тым ліку спажывецкія, робяцца неканкурэнтаздольнымі ў Расеі

Расейскі рынак і надалей будзе скарачацца для беларускіх тавараў. І ня толькі для аўтамабіляў, — адзначае маскоўскі эканаміст Дзьмітрый Балкунец:

«Беларуская прадукцыя не пасьпявае за той мадэрнізацыяй, якая цяпер праводзіцца ў Расеі. Многія беларускія тавары, у тым ліку спажывецкія, робяцца неканкурэнтаздольнымі ў Расеі. Напрыклад, учора я чарговым разам пабачыў літровую бутэльку беларускага кефіру ў маскоўскай краме коштам 93 расейскія рублі. Хоць расейскія аналягі не перавышаюць 50 рублёў. Я нават ня ведаю, хто яго купляе.

У Расеі ёсьць грошы для закупу больш якаснай прадукцыі. А беларускія машыны, той жа БелАЗ, за якасьцю не пасьпяваюць. І таму расейскія прапановы аб’яднаць аўтамабільныя актывы, улічваючы вялікую долю паставак зь Беларусі ў Расею, я лічу абгрунтаванымі і рацыянальнымі».

Паказаць камэнтары

XS
SM
MD
LG