Лінкі ўнівэрсальнага доступу

Паўла Вінаградава асудзілі на 12 сутак


Павал Вінаградаў

Павал Вінаградаў

Актывіста «Гавары праўду» Паўла Вінаградава асудзілі на 12 сутак адміністрацыйнага арышту за «несанкцыянаваны пікет».

23 красавіка ў Цэнтральным судзе Менску адбыўся працэс над актывістам, былым палітвязьнем Паўлам Вінаградавым, якога міліцыя затрымала напярэдадні паводле падазрэньня ў арганізацыі акцыі салідарнасьці зь Мікалаем Статкевічам. 21 красавіка над уваходам у мэтро «Няміга» быў вывешаны партрэт Мікалая Статкевіча і бел-чырвона-белы сьцяг. На наступны дзень стала вядома пра затрыманьне Паўла Вінаградава.

Сёньня судзьдзя Вікторыя Шабуня разглядзела ягоную адміністрацыйную справу.

Сьвятлана Вінаградава: «Працэс праходзіў вельмі хутка. Паўла асудзілі за незаконнае пікетаваньне. Ён прызнаў, што вывесіў партрэт Статкевіча і бел-чырвона-белы сьцяг, але не прызнаў, што ў ягоных дзеяньнях быў склад адміністрацыйнага парушэньня. Сьведак не было, паказалі відэазапіс і фатаздымкі, якія былі выкладзеныя ў інтэрнэт. Гэта і стала доказамі. Судзьдзя зь імі пагадзілася.

Судзьдзя не дапусьціла на працэс журналістаў і публіку, нічога не патлумачыўшы».

Якой была мэта акцыі Паўла Вінаградава?

Сьвятлана Вінаградава: «Павал імкнуўся выказаць салідарнасьць зь Мікалаем Статкевічам, адзіным кандыдатам на прэзыдэнта падчас апошняй прэзыдэнцкай кампаніі, якога працягваюць трымаць за кратамі ў турме. На Статкевіча працягваюць аказваць жорсткі прэсінг, нядаўна супроць яго адбыліся новыя правакацыі. Павал вырашыў яго падтрымаць — і падтрымаў. Ён добра ведаў, што яго затрымаюць і асудзяць на „суткі“, і нават падрыхтаваў торбу для арышту».
Акцыя «Свабоду Статкевічу», за правядзеньне якой пакаралі Вінаградава

Акцыя «Свабоду Статкевічу», за правядзеньне якой пакаралі Вінаградава


Паводле Сьвятланы Вінаградавай, яе муж за мінулы год адбыў больш за 60 дзён пад арыштам за ўдзел у несанкцыянаваных акцыях салідарнасьці і пратэсту. Сёлета гэта другое па ліку затрыманьне.

У 2011 годзе Павал Вінаградаў быў асуджаны на 4 гады зьняволеньня за ўдзел у мітынгу пратэсту супроць фальшаваньня прэзыдэнцкіх выбараў. Адбываў пакараньне ў івацэвіцкай калёніі, восеньню таго ж году быў памілаваны. З 2012 году Павал Вінаградаў паводле суду знаходзіцца пад прафіляктычным наглядам міліцыі.

Паказаць камэнтары

XS
SM
MD
LG