Лінкі ўнівэрсальнага доступу

Тэрэса Стшэлец спадзяецца на гуманізм беларускіх уладаў


Тэрэса Стшэлец

Тэрэса Стшэлец

Грамадзянка Польшчы Тэрэса Стшэлец, якую беларускія ўлады другі месяц не адпускаюць на радзіму, трымае галадоўку пратэсту на тэрыторыі польскага кансуляту ў Берасьці. У яе сканчаюцца лекі. Беларускія ўлады ніяк не рэагуюць на галадоўку.

Тэрэса Стшэлец галадае ў адным з жылых памяшканьняў Генэральнага консульства Польшчы ў Берасьці, мае патрэбныя санітарныя ўмовы. На стаўленьне супрацоўнікаў польскага кансуляту яна не наракае, кажа, што польскія дыпляматы сапраўды дамагаюцца яе вызваленьня. Увечары ў аўторак Тэрэса Стшэлец пацьвердзіла Свабодзе, што працягвае галадоўку пратэсту:

«Так, цяпер працягваецца мая галадоўка… Я яшчэ ня думала аб тым, колькі працягнецца галадоўка. Тады быў у мяне такі стан, што я сказала ў кансуляце: ніколі адсюль не сыду».

Пра стан свайго здароўя спадарыня Тэрэса сказала:

«О Божа, галава баліць, нэрвы выматаныя, я не ўяўляю, як вытрымаць… Лекі крыху маю, а яшчэ крыху мне абяцаюць даставіць з Польшчы, муж пойдзе да лекаркі, яна, можа, выпіша рэцэпты. Спадзяюся, што муж неяк вырашыць гэтае пытаньне зь сямейным лекарам».

На мінулым тыдні прадстаўнік МЗС Польшчы Марцін Басацкі выказваў спадзеў, што 9 красавіка беларускія ўлады прымуць нейкае рашэньне ў справе Тэрэсы Стшэлец і адпусьцяць яе. Сёньня прайшоў месяц з дня першага звароту аб тым, каб Тэрэсу адпусьцілі. Але ніякага рашэньня няма, кажа спадарыня Стшэлец:

«Чакаю сёньня, сёньня павінны былі ўхваліць афіцыйнае рашэньне. Але на гэты момант ніякага рашэньня няма. Ходзяць чуткі на гэты конт, але не хачу пра іх казаць, каб мяне зноў у чым не абвінавацілі, ня дай Бог. Але афіцыйна яшчэ не. Сёньня разам з консулам будзем зноў пісаць беларускім уладам тое самае: каб адпусьцілі мяне дзеля гуманітарных меркаваньняў, людзкіх. Каб проста па-людзку адпусьцілі дадому, а справа хай сабе ідзе. Хай мяне адпусьцяць, я ж нікога не забіла, нічога ня ўкрала».

У Берасьці спадарыні Стшэлец прапанавалі дапамогу лекара, але ёй трэба сустрэцца з тымі лекарамі, якія ёй апякуюцца ў Польшчы, у тым ліку пасьля апэрацыі.

Учора да спадарыні Стшэлец з Польшчы прыяжджаў яе муж Яраслаў, але сустрэцца ня змог — кансулят ужо быў зачынены. Сябар сям’і Стшэлец зь Берасьця Вячаслаў сёньня выяжджае ў Польшчу па лекі для спадарыні Стшэлец. На другі дзень галадоўкі ён бачыў Тэрэсу.

Спадар Вячаслаў гэтак апісаў стан Тэрэсы:
Здаецца, выйшла, спрабуе ўсьміхнуцца, а вочы ледзь не закочваюцца

«Стан яе кепскі, у яе такое слабое здароўе. Здаецца, выйшла, спрабуе ўсьміхнуцца, а вочы ледзь не закочваюцца. Калі яе затрымалі, яна так перахвалявалася, што ледзьве ня траціла прытомнасьць. А тым больш у яе такі букет усіх хваробаў, вельмі сур’ёзных… І ўсе гэтыя дакумэнты мы выслалі на Менск».

Пакуль Тэрэса Стшэлец працягвае галадоўку ў берасьцейскім кансуляце Польшчы, афіцыйныя ўлады ніяк не рэагуюць на гэта. Генэральны консул Польшчы ў Берасьці Ганна Навакоўска кажа, што ніякіх адказаў на запыты амбасады па справе Стшэлец няма:

«Няма пакуль, чакаем. Мы працуем з гэтай справай».

Начальнік ідэалягічнага ўпраўленьня Берасьцейскага аблвыканкаму Аляксандар Цырэльчук таксама не праліў сьвятла на сытуацыю з галадаючай грамадзянкай Польшчы:

«Я ніякай інфармацыяй у гэтай справе не валодаю…»

У Берасьцейскай мытні сказалі, што афіцыйных камэнтароў даваць ня будуць, і прапанавалі чакаць рэакцыі Дзяржаўнага мытнага камітэту.

Ужо больш за месяц Тэрэсу Стшэлец не выпускаюць зь Беларусі, ануляваўшы ёй візу, пасьля таго як яна адмовілася сплаціць шматмільённае мыта і штраф.

Год таму Тэрэса Стшэлец пакінула ў Берасьці ў рамонт зламаны джып і вярнулася пасьля вандроўкі ў Польшчу. Сын гаспадара майстэрні скраў ключы, паехаў катацца на польскім аўтамабілі, але быў спынены міліцыяй. Берасьцейскія мытнікі кажуць, што палічылі, нібыта свой джып Тэрэса Стшэлец прадала ў Беларусі, не сплаціўшы мыта. Тэрэсу Стшэлец, якая праз суд дамагалася вяртаньня аўтамабіля, прымушаюць сплаціць мыта і штраф — усяго каля 200 мільёнаў рублёў. А за джып, які ў канцы году мытнікі прадалі, прапаноўваюць гаспадыні каля 50 мільёнаў рублёў кампэнсацыі.

8 красавіка ў кансуляце Польшчы ў Берасьці спадарыня Стшэлец абвясьціла галадоўку.
XS
SM
MD
LG