У суд выклікаюць Юлію Дарашкевіч, фатографку і арганізатарку конкурсу «Прэс-фота Беларусі». Экспэртыза канфіскаваных летась на мытні альбомаў «Прэс-фота Беларусі» за 2011 год прызнала іх экстрэмісцкімі. Такую ж позву атрымаў і фатограф Вадзім Заміроўскі.
Як паведамляецца ў лісьце з КДБ, у фотаальбоме «утрымліваюцца наўмысна скажоныя факты пра жыцьцядзейнасьць Беларусі, якія не адпавядаюць рэчаіснасьці». Экспэртыза кваліфікавала альбом як «дзейнасьць грамадзянаў, накіраваную на прыніжэньне нацыянальнага гонару і годнасьці» і аднесла гэтае парушэньне да экстрэмізму.
Юлія Дарашкевіч ня ведае, якія менавіта здымкі маглі стаць падставай для такога заключэньня камісіі, аднак адзначае, што гэты альбом фіксаваў падзеі, якія адбыліся ў 2010 годзе.
«Гэта вельмі дзіўна, бо гэта зрэз таго, што адбылося за той год. Ён адлюстроўвае навіны і культурныя падзеі, спорт і прыроду. Мы ня можам казаць, што ўсе здымкі нэгатыўныя. Але фотажурналісты адлюстроўваюць рэчаіснасьць такой, якая яна ёсьць на самой справе. І місія фотажуржурналіста падымаць праблемы, прыцягваць увагу гледачоў да гэтых праблемаў».
Экспэртызу рабілі выкладчыкі Гарадзенскага ўнівэрсытэту і мясцовыя ідэолягі.
Суд адбудзецца 17 красавіка ў Ашмянах. Фатографы выкліканыя ў якасьці зацікаўленых асобаў.
Адразу пасьля канфіскацыі Юлія Дарашкевіч тлумачыла, што альбомы былі выдадзены цалкам легальна і ўсе мыты на іх даўно сплачаныя.
Мы казалі мытнікам, што дакумэнты на ўвоз гэтых альбомаў у Беларусь ужо ёсьць у іх базе, але яны не змаглі ў сябе гэта пацьвердзіць».
Альбомы «Прэс-фота Беларусі» ўжо аднойчы вымаліся для экспэртызы два гады таму. Іх вярнулі празь месяц.
«Прэс-фота Беларусі» — гэта адкрыты незалежны конкурс прэс-фатаграфіі ў Беларусі. Ён праводзіцца штогод.
