Лінкі ўнівэрсальнага доступу

Бабуля Ўладзіслава Грудзьева: «Пакуль у нас усё спынена»


Андрэй Забабура

Андрэй Забабура

Пацярпелыя па справе менскага школьніка Ўладзіслава Грудзьева, які загінуў пад коламі аўтамабіля «Паршэ Каен» у лістападзе 2012 году, адклікалі свае пазовы да асуджанага кіроўцы Андрэя Забабуры.

Гэта пацьвердзіла карэспандэнту Свабоды бабуля хлопчыка, які загінуў, — спадарыня Ала:

«Пакуль адклікалі. А што далей будзе? Пакуль у нас усё спынена».

У мэдыях паведамлялася, што маці Ўладзіслава патрабавала з Андрэя Забабуры 200 млн рублёў, бабуля — 150 млн, дзядуля — 100 млн рублёў. Пасьля трагедыі Забабура ўжо перадаў маці 200 млн рублёў.

Спадарыня Ала ня стала камэнтаваць гэтую інфармацыю і прычыну адкліканьня пазоваў:

«Гэта наша таямніца душэўная. Гэта ўсё, што можам вам сказаць. У мяне на гэта — маўчаньне».

Ці прызнаў сваю віну кіроўца «Паршэ Каен» Андрэй Забабура?

«Ён віну сваю прызнаў. І мы далей думаем. Нашы душы пакуль супакоіліся, пакуль маем права цягам дзесяці дзён думаць і будзем далей глядзець. Ён жа падаў касацыю з прызнаньнем віны. І пасьля касацыі будзем думаць. Калі ён падаваў касацыю, ён не прызнаваў сваю віну. А пасьля, перад судом, ён прызнаў сваю віну», — сказала спадарыня Ала.

Спадарыня Ала сказала. што страта ўнука — гэта гора, ад якога з кожным днём не становіцца лягчэй:

«Мы яшчэ гэтага не перажылі. Гэта будзе перажывацца дзесяцігодзьдзямі, якія будуць складацца дзесяць за дзесяць. Усё жыцьцё. Гэта застанецца назаўсёды».

Адвакаты кіроўцы і пацярпелых ніякай інфармацыі па справе не даюць, спасылаючыся на тое, што няма дазволу ад іхніх кліентаў.

Кіроўца аўтамабіля «Паршэ Каен» Андрэй Забабура 13 лістапада мінулага году наехаў каля менскай школы № 23 на трэцяклясьніка Ўладзіслава Грудзьева. 15 лютага суд Фрунзенскага раёну прысудзіў яму чатыры гады пазбаўленьня волі ў калёніі-пасяленьні. 38-гадовы дырэктар фірмы прызнаны вінаватым паводле ч. 2 арт. 317 Крымінальнага кодэксу (парушэньне правілаў дарожнага руху, якое пацягнула за сабой па неасьцярожнасьці сьмерць чалавека). 29 сакавіка калегія Менскага гарадзкога суду не задаволіла скаргу абароны Андрэя Забабуры на вынесены прысуд.

Паказаць камэнтары

XS
SM
MD
LG