Лінкі ўнівэрсальнага доступу

МЗС Польшчы: Беларусь ускладняе паездкі сваім грамадзянам


Міністэрства замежных справаў Польшчы шкадуе, што беларускія ўлады чарговым разам з палітычных прычынаў ускладняюць жыцьцё сваім грамадзянам.

Так польскі МЗС пракамэнтаваў для Радыё Свабода папрок афіцыйнага Менску ў «антыбеларускай пазыцыі» Польшчы. Прэсавы сакратар МЗС Беларусі Андрэй Савіных напярэдадні заявіў, што «ўступленьне ў дзеяньне дамовы аб спрошчаным перасячэньні мяжы паміж Беларусьсю і Польшчай у бліжэйшы час не прадугледжваецца». Ён сказаў, што гэта зьвязана з той жорсткай антыбеларускай пазыцыяй, якую займае ўрад Польшчы.

Польскі МЗС сьцьвярджае, што гатовы да ўвядзеньня «малога памежнага руху», а таксама, нягледзячы на цяжкасьці, робіць «усё магчымае, каб выдаваць як найболей візаў».

МЗС Польшчы нагадвае, што ў 2012 годзе польскія консульствы ў Менску, Берасьці і Горадні выдалі беларускім грамадзянам рэкордную колькасьць візаў: 350 тысячаў. МЗС сьцьвярджае, што выдаваць большую колькасьць візаў перашкаджае малая колькасьць консулаў, а «неаднаразовыя просьбы да беларускіх уладаў павялічыць колькасьць консулаў, на жаль, не далі вынікаў».

МЗС дадае, што ў выпадку ўвядзеньня «малога памежнага руху» каля 1.1 млн. чалавек у Беларусі атрымалі б магчымасьць уезду на тэрыторыю Польшчы. Адпаведнае пагадненьне Польшча ратыфікавала 17 верасьня 2010 году, калі прэзыдэнт Браніслаў Камароўскі падпісаў дакумэнт. Беларусь да гэтага часу падобнага кроку не зрабіла.

Паказаць камэнтары

XS
SM
MD
LG