Лінкі ўнівэрсальнага доступу

Сход дэпутатаў Вярхоўнага Савету XIII скліканьня. Жывы рэпартаж


У першым шэрагу Павал Знавец, Аляксандар Дабравольскі, Станіслаў Багданкевіч, Міхаіл Пастухоў

У першым шэрагу Павал Знавец, Аляксандар Дабравольскі, Станіслаў Багданкевіч, Міхаіл Пастухоў

Дэпутаты сабраліся на сядзібе БНФ у Менску, каб падпісаць дакумэнт у абарону эканамічнага і палітычнага сувэрэнітэту краіны.

15:00 Пасьля грунтоўнага абмеркаваньня, у якім узялі ўдзел 11 дэпутатаў, быў прыняты дакумэнт «Намэнклятурная прыватызацыя — пагроза страце эканамічнага сувэрэнітэту Беларусі». Асноўная ідэя дакумэнту — што ўсе тыя зьдзелкі, якія робіць нелегітымная ўлада, прадаючы беларускую агульнародную ўласнасьць у сваіх інтарэсах, пры зьмене ўлады ня будуць лічыцца легітымнымі.

Дэпутаты заклікалі ўсіх грамадзянаў Беларусі далучыцца да іх заявы.


14:00 Усяго на сустрэчы выступілі 11 дэпутатаў Вярхоўнага Савета XIII скліканьня. Зараз ідзе праца над дакумэнтамі, якія будуць прымацца.

13:35 Выступае Генадзь Грушавы: «Дакумэнт па сутнасьці нічога ня варты. Нельга так пісаць дакумэнты, якія выходзяць зь Вярхоўнага Савету».
Генадзь Грушавы

Генадзь Грушавы


13:30 Выступае Сяргей Калякін: «Дабрабыт беларусаў — гэта праяданьне будучыні. У нас былі калясальныя прэфэрэнцыі, якія ніхто не атрымаў на прасторах былога Савецкага Саюзу. Што мы сёньня стварылі? Мы вывелі нешта на сусьветны ўзровень? А сёньня ўлада ўзялася за праяданьне таго, што яна ўжо і не стварала. Прадажа Беларуськалію — гэта проста злачынства супраць беларускага народу.

Я як чалавек сацыялістычных перакананьняў згодны з высновамі Станіслава Багданкевіча.

Мы з вамі гэтую ўладу не прызнаём і яе рашэньні не прызнаём легітымнымі. Для нас спрэчка пра яе легітымнасьць — бессэнсоўная.

Я веру, што ў Беларусі будзе дэмакратычная сыстэма. І тады нашыя рашэньні будуць мець юрыдычныя наступствы. І пра гэта мусяць ведаць людзі і ў Расеі, і ў Кітаі, і ў Эўропе. Яны мусяць ведаць, што калі яны будуць купляць прадпрыемствы, то высокая верагоднасьць таго, што пры новай уладзе гэтая ўласнасьць будзе аднятая».
Падчас сходу

Падчас сходу


13:15 Выступае Аляксандар Дабравольскі: «Галоўная праблема — тое, што можа быць прададзены „Беларуськалій“. І пасьля мы ўжо нічога ня вернем. Можа быць прададзеная, напрыклад, Беларуская чыгунка. Калі мы зараз гэта ня скажам, то перавагу будуць мець карупцыянэры ў прыватызацыі. Трэба адлюстраваць тое, што прыватызацыя непразрыстая, негалосная.

Мая прапанова: абавязкова гэты дакумэнт прымаць, але ўдакладніць фармулёўкі і выкінуць, магчыма, лішні патас».
Павал Знавец і Аляксандар Дабравольскі

Павал Знавец і Аляксандар Дабравольскі


13:10 Выступае Ўладзімер Ганчарык: «Праект патрабуе сур’ёзнай рэдакцыі, у першую чаргу ў дачыненьні тэрмінаў. Што такое „сэйфавая“ прыватызацыя? Што такое „намэклятурная прыватызацыя“?

„Вось прыйдзем да ўлады — усё вернем народу“ — а як мы гэта зробім? Нам трэба думаць пра тое, што мы хочам сказаць. Мы хочам сумленнай і галоснай прыватызацыі. Я б падтрымаў прапанову прафэсара Багданкевіча пра дадатковы пункт: мы выступаем за забарону прыватызацыі прыродных рэсурсаў і найперш „Беларуськалію“.

Калі мы сёньня паставім пытаньне пра тое, што ўсе зьдзелкі незаконныя, то трэба ўлічваць, што маса аб’ектаў прыватызаваная нашымі людзьмі.

Дакумант трэба дапрацаваць».
Уладзімер Ганчарык

Уладзімер Ганчарык


13:05 Выступае Людміла Гразнова: «Мы сёньня заявілі, што ўсе зьдзелкі па прыватызацыі нелегітымныя. Якая будзе рэакцыя патэнцыйных пакупнікоў на гэтую інфармацыйную, піяр-навіну? Заходнія інвэстары, якія прыслухаюцца да нас, падумаюць: „Яны кажуць, што зьдзелкі будуць незаконнымі? Ці варта сюды ісьці са сваімі капіталамі?“. Мы такім чынам адсякаем ад гэтага прыватызацыйнага рынку значную колькасьць заходніх інвэстараў.

Іншыя пакупнікі як будуць рэагаваць: „Чаму б сюды ня ўкласьціся?“

Мы ведаем, што ёсьць іншыя формы рынкавых стасункаў, якія будуюцца не на законнасьці. І ёсьць пакупнікі, для якіх словы нейкіх былых дэпутатаў нічога ня будуць значыць. Такім чынам кошты на дзяржактывы будуць зьніжаныя ў некалькі разоў, дзяржбюджэт недаатрымае грошы.
Валерый Шчукін

Валерый Шчукін


А на нашыя актывы прыйдуць тыя, хто працуе не па тых нормах, якія б нас задавальнялі. Мы трапляем у залежнасьць ад гэтых фігур.

Нам гэта выгадна? Для краіны гэта карысна?

Так ці інакш, працэс дыялёгу ў краіне будзе адбывацца. Калі-небудзь мы сядзем за адзін круглы стол: з аднаго боку мы, прадстаўнікі эліты, апазыцыі. З іншага боку — прадстаўнікі ўлады.

Калі сёньня мы прымем такую рамантычную заяву, як да нас будуць ставіцца нашыя людзі? Мы распісваемся ў сваім непрафэсіяналізьме. Я выступаю супраць такіх зваротаў!»

12:50 Станіслаў Багданкевіч: «Прыватызацыю мусіць праводзіць легітымная ўлада. Бо пад выглядам прыватызацыі мы распрадаём агульнанацыянальную вартасьць. У нас такой улады няма. Гаварыць пра законнасьць прыватызацыі немагчыма.

Другое — вышэйшы орган дзяржаўнай улады мусіць вызначыць пералік дзяржаўных актываў, якія ў бліжэйшыя 15-20 гадоў у прынцыпе ня мусяць прадавацца. Іх у нас няшмат. У першую чаргу гэта калійныя солі. Гэта прадаваць ні за якія грошы нельга. Пасьля трэба вызначыць, у якіх дзяржактывах кантрольны пакет мусіць застацца ва ўласнасьці дзяржавы.

Мы мусім замацаваць заканадаўча, што гэта капітал і што ён мусіць быць захаваны. Яго трэба толькі нарошчваць. На спажываньне ў бюджэт яго немагчыма залічаць. Ён мусіць быць захаваны для нацыі, для грамадзтва. Таму ўлада мусіць адкрыць сайт у інтэрнэце для народа: атрымалі 5 мільярдаў ад Белтрансгазу — і куды выкарыстоўваеце гэтыя сродкі? Вось гэта галоўнае. І па крэдытах тое самае трэба зрабіць».

Багданкевіч зьвяртае ўвагу на аўтарытарнае кіраваньне беларускай эканомікі, лічыць, што трэба мяняць гэтую мадэль. Структурныя зьмены, якія патрэбныя краіне — гэта нарошчваньне малога і сярэдняга прыватнага бізнэсу.

«Мы жывем не па сродках. Мы закладаем бомбу, чарговую дэвальвацыю, чарговае зьнікненьне нашых зьберажэньняў.

Мы мусім прыйсьці да ўлады праз выбары. Як гэта зрабіць, я ня ведаю. Я эканаміст, а вы палітыкі. Вы кепска працуеце», — папікае былых дэпутатаў Станіслаў Багданкевіч.

12:40 Выступае прафэсар Міхаіл Пастухоў. Ён назваў сёньняшні сход «гістарычным».
Міхаіл Пастухоў

Міхаіл Пастухоў


«Хачу нізка пакланіцца тым дэпутатам, якія засталіся верныя Канстытуцыі 1994 году».

«Вярхоўны Савет быў незаконна распушчаны па выніках увядзеньня ў дзеяньне новай рэдакцыі Канстытуцыі краіны ў лістападзе 1996 году. Я хачу пацьвердзіць словы, сказаныя дэпутатам Лябедзькам. Сапраўды, дэпутаты ВС, якія не ўвайшлі ў склад Палаты прадстаўнікоў, захавалі сваю легітымнасьць да цяперашняга часу. Я лічу сябе легітымным судзьдзём Канстытуцыйнага суду».

12:30 Выступае Анатоль Лябедзька: «У свой час кожны з нас зрабіў вялікі грамадзянскі ўчынак. Мы сабраліся сваім колам. У кожнага з нас была мажлівасьць застацца ў кабінэце на тры вакны з пэрсанальным аўтамабілем, не наклікаць на сваю галаву праблемы. Але мы зрабілі такі ўчынак, паказалі, што ў Беларусі ёсьць людзі, якія думаюць нацыянальнымі інтарэсамі. І гэта проста здорава. І сёньня прыйшоў час зрабіць яшчэ адзін такі ўчынак. Калі мы прымем гэты дакумэнт, то можам больш нічога не прымаць. Але гэты крок застанецца і стане падставай для самых важных рашэньняў у краіне».
Анатоль Лябедзька

Анатоль Лябедзька


12:10 Пачатак сходу затрымаўся, бо чакалі, пакуль прыбудзе Сяргей Калякін і яго аднапартыйцы. Цяпер сход значна ажывіўся. Агулам у залі каля двух дзясяткаў дэпутатаў.

Карыстаючыся затрымкай, журналісты бяруць інтэрвію і робяць фатаздымкі. Журналістаў у залі, бадай, ня меней за саміх дэпутатаў.

Пачынаецца сход. Вядучымі сходу абраныя Анатоль Лябедзька і Сяргей Калякін. На пачатку хвілінай маўчаньня згадалі тых, каго ўжо «няма разам з намі».

Лябедзька: «Сытуацыя з уласнасьцю ў Беларусі прымусіла нас сабрацца разам. Ёсьць рэальная пагроза, што мы можам страціць краіну. Нас непакоіць, што можа паўтарыцца тая „прыхватызацыя“, якая была ў Расеі. Таму сёньня будзем падпісваць дакумэнт».

Калі зьбіраліся апошнім разам, дэпутаты ўжо ня могуць і згадаць. Сярод удзельнікаў збору — Станіслаў Багданкевіч, Аляксандар Дабравольскі, Валер Шчукін, Уладзімер Ганчарык, Людміла Гразнова.

Лябедзька: «Кагосьці ўжо няма, як Генадзя Карпенкі, хтосьці выехаў з краіны. Сёньня мы падпішам дакумэнт тут, а пазьней прапануем усім грамадзянам Беларусі паставіць пад ім свой подпіс».
Выступае Анатоль Лябедзька

Выступае Анатоль Лябедзька

Паказаць камэнтары

XS
SM
MD
LG