Лінкі ўнівэрсальнага доступу

Мікалай Статкевіч не атрымлівае прадметаў гігіены


Мікалай Статкевіч

Мікалай Статкевіч

Палітвязень Мікалай Статкевіч за час зьняволеньня ніводнага разу не атрымаў прадметаў гігіены ды іншых рэчаў, на якія для кожнага вязьня з бюджэту выдзяляюцца грошы.

Пра гэта кажа жонка палітыка Марына Адамовіч, якая спрабуе праз заявы ў адпаведныя ўстановы зьмяніць становішча.

«Кожны зьняволены мае права атрымоўваць сродкі гігіены: аднаразовыя станкі для галеньня, туалетную паперу, зубную пасту альбо парашок і шчоткі, мыла гаспадарчае і туалетнае. Нормы прадугледжаныя пастановай Савету міністраў. Наколькі мне вядома з кантактаў са сваякамі вязьняў і з нашага асабістага досьведу, гэтыя нормы не выконваюць у прынцыпе. Калі ёсьць пастанова ўраду, то грошы з бюджэту мусяць выдзяляцца, але куды яны ідуць, гэта пытаньне да пэнітэнцыярнай сыстэмы. Я пляную гэтую тэму не пакідаць».

Днямі Марына Адамовіч атрымала ліст ад Мікалая Статкевіча, у якім палітвязень паведаміў, што пачуваецца нармальна, навінаў у рэжыме ягонага ўтрыманьня няма.

Былы кандыдат на прэзыдэнта Мікалай Статкевіч асуджаны на 6 гадоў зьняволеньня за падзеі 19 сьнежня 2010 года. Больш за год палітыка трымаюць ў магілёўскай турме як злоснага парушальніка рэжыму адбыцьця пакараньня.
XS
SM
MD
LG