Лінкі ўнівэрсальнага доступу

«Чавэс — адзіны, хто ня ставіўся да Лукашэнкі паблажліва»


Алесь Лагвінец

Алесь Лагвінец

Чаму Аляксандар Лукашэнка гэтак асабіста ўспрыняў сьмерць Уга Чавэса? Ці можна сказаць, што памерлы вэнэсуэльскі лідэр быў для беларускага кіраўніка ўнікальным палітычным сябрам? Ці стала абвяшчэньне жалобы ў краіне пераборам, які беларускае грамадзтва ня ўспрыме пазытыўна? На гэтыя пытаньні адказвае палітоляг Алесь Лагвінец.

— Часта палітычныя аналітыкі кажуць, што ў дзеяньнях Аляксандра Лукашэнкі ўсё рацыянальна і палітычна выгадна. Аднак бываюць моманты, якія прымушацюь сумнявацца ў гэтым. Як здаецца, адзін з такіх момантаў — гэта рэакцыя Лукашэнкі на сьмерць Чавэса. У краіне аб’яўленая жалоба, БТ у навінах 40 хвілінаў апавядае пра вэнэсуэльскага прэзыдэнта. Чаму Аляксандар Лукашэнка гэтак балюча ўспрыняў сьмерць Уга Чавэса?

— Мне падаецца, тут вельмі важны эмацыйны бок стаўленьня Лукашэнкі да Чавэса. Для Лукашэнкі Чавэс — гэта ў нечым большы за брата. Чавэс — магчыма, адзін з сусьветных палітыкаў і кіраўнікоў дзяржавы, які ня ставіўся да Лукашэнкі паблажліва і прыніжальна. Чавэс у пэўны момант, хутчэй за ўсё, нават бескарысьліва падтрымаў і выратаваў Лукашэнку.

Дыктатары — людзі самотныя, і яны могуць давяраць толькі вельмі вузкаму колу людзей. Па-першае, гэта сямейнікі, іхнія дзеці. Па-другое, гэта роўныя ім людзі, якія не пераходзяць ім дарогу. У дадзеным выпадку Чавэс апынуўся ідэальным «субратам» для Лукашэнкі.

Тое, што Лукашэнка казаў пра Чавэса — ён, выглядае, казаў пра сябе. Менавіта ў Лукашэнкі самога не было больш блізкіх адносінаў ні зь якім іншым кіраўніком дзяржаваў, апроч Чавэса. Выглядае, што расейскія кіраўнікі, зь якімі ён інтэгруецца ўжо столькі гадоў, глядзяць на яго паблажліва і зьверху. Што тычыцца дэмакратычных палітыкаў, то яны, відавочна, ня маюць да яго даверу, бачачы ягоную аўтарытарную сутнасьць і невысокую агульную і палітычную культуру.

— У краіне жалоба, прыспушчаныя сьцягі, але людзі ходзяць па вуліцах з кветкамі напярэдадні 8 сакавіка, і відавочна, ня вельмі пераймаюцца з нагоды сьмерці Чавэса. Ці ня стала пераборам абвешчаная жалоба?

— Вядома, у Беларусі шмат хто пасьмейваецца з гэтага, з такой дыктатарскай салідарнасьці. Аднак гэта чаканы крок ад Лукашэнкі, ён тут у сваім рэпэртуары. Лукашэнка вырашыў вызначыцца, і гэта ўнікальная сытуацыя ў гісторыі Беларусі, калі краіна ў жалобе ажно тры дні.
  • 16x9 Image

    Віталь Цыганкоў

    Віталь Цыганкоў скончыў факультэт журналістыкі БДУ. Адзін з двух заснавальнікаў першага недзяржаўнага агенцтва навінаў БелаПАН. Працаваў ў газэтах «Звязда», быў карэспандэнтам у Беларусі расейскай «Независимой газеты», Associated Рress, аглядальнікам у газэце «Свабода».  На беларускай Свабодзе ад 1994 году. Карэспандэнт расейскай Свабоды ў Беларусі.
     

Паказаць камэнтары

XS
SM
MD
LG