Лінкі ўнівэрсальнага доступу

logo-print

Удава Міхася Чарняўскага: Ён на тым сьвеце шукае Расьціслава Лапіцкага


У офісе Партыі БНФ прэзэнтавалі перавыданьне кнігі гісторыка Міхася Чарняўскага «Ня бойцеся ахвяраў і пакут».

Каардынатар перавыданьня, мэнэджэр культурніцкіх праектаў Алесь Мазанік адзначыў, што наклад стаўся магчымым дзякуючы супольным намаганьням неабыякавых людзей, якія падтрымалі апошнюю волю Міхася Чарняўскага і ахвяравалі сродкі для перавыданьня яго кнігі.

«Міхась Чарняўскі заўсёды казаў, што яго кнігі, як стрэлы, — яны не павінны ляжаць бяз справы, яны павінны страляць. Няхай удалося выдаць кнігу накладам усяго 500 асобнікаў — я перакананы, што кожны асобнік прачытаюць дзясяткі людзей», — сказаў Алесь Мазанік.
Алесь Мазанік

Алесь Мазанік


Удава Міхася Чарняўскага Сьвятлана апавяла, што спадар Міхась да апошніх сваіх дзён меў безьліч творчых плянаў, да апошніх сваіх гадзінаў працаваў: «Ён зьнёс з сабой вельмі шмат задумаў. Ён пры жыцьці праз сваю мэтанакіраванасьць і актыўнасьць вельмі шмат пасьпеў. Толькі па археалёгіі ў яго выйшла больш за 2000 навуковых публікацый. Яго ідэяў хапіла б яшчэ на 100 гадоў жыцьця. Цяпер, калі ён на тым сьвеце, ён там шукае Расьціслава Лапіцкага — ім ёсьць пра што пагаварыць».
Сьвятлана Чарняўская

Сьвятлана Чарняўская


Пісьменьнік і гісторык Уладзімер Арлоў апавёў удзельнікам памятнай вечарыны, як шмат зрабіў Міхась Чарняўскі для яго і для цэлага пакаленьня гісторыкаў і пісьменьнікаў:

«Калі я гляджу на якога-небудзь чалавека, то задаю сабе пытаньне: „Ці пайшоў бы ён на паўстаньне Кастуся Каліноўскага?“ Дык вось Міхась Чарняўскі дакладна пайшоў бы. І загінуў бы ў першых шэрагах. Альбо на шыбеніцы. Іначай і быць ня можа — гэты чалавек, будучы яшчэ пяціклясьнікам у Мядзеле, раскідваў самаробныя ўлёткі „Прэч расейскіх акупантаў“, натхніўшыся Расьціславам Лапіцкім».
Уладзімер Арлоў

Уладзімер Арлоў


На завяршэньне вечарыны выступілі музыкі Аляксандар Памідораў, Зьміцер Бартосік ды Андрэй Мельнікаў.

Паказаць камэнтары

XS
SM
MD
LG