Лінкі ўнівэрсальнага доступу

«Бацькаўшчына» склікае шосты зьезд беларусаў сьвету


Пяты зьезд Згуртаваньня беларусаў сьвету «Бацькаўшчына», 2009 год

Пяты зьезд Згуртаваньня беларусаў сьвету «Бацькаўшчына», 2009 год

Форум беларускай дыяспары і мэтраполіі заплянаваны на ліпень.

Згуртаваньне беларусаў сьвету «Бацькаўшчына» ладзіць зьезды раз на чатыры гады, пачынаючы з 1993 году. На Першым зьезьдзе сабралася больш за тысячу дэлегатаў зь беларускіх асяродкаў замежжа і Беларусі. Як паведамляе прэсавая служба арганізацыі, чакаецца, што сёлетні форум зьбярэ больш за 300 дэлегатаў з 20 краін сьвету.

Паводле рашэньня Малой Рады ЗБС «Бацькаўшчына», шосты зьезд беларусаў сьвету мае адбыцца 23–24 ліпеня ў Менску. На абмеркаваньне дэлегатаў будзе вынесеная тэма «Беларуская нацыя ва ўмовах глябалізацыі: выклікі і магчымасьці».

«У новых умовах беларускія дыяспары сутыкаюцца і з праблемамі размываньня нацыянальнай ідэнтычнасьці, касмапалітызму значнай часткі новых эмігрантаў, зьмяншэньня цікавасьці да нацыянальнай дзейнасьці сярод моладзі, а таксама з пытаньнем адэкватнага вызначэньня далёкасяжных мэтаў існаваньня беларускіх арганізацыяў.

Гэтыя і іншыя праблемы, таксама як і новыя формы актыўнасьці асяродкаў, іх сувязяў з мэтраполіяй вартыя адмысловага асэнсаваньня і абмеркаваньня на грамадзкім і дзяржаўных узроўнях», — паведамляе прэсавая служба арганізацыі.

У рамках зьезду будуць працаваць тры сэкцыі:

1. Магчымасьці ўнутраных сіл Беларусі і дыяспары па ўмацаваньні нацыянальнай ідэнтычнасьці.

2. «Новая» і «старая» эміграцыі: супраца на карысьць нацыянальнага разьвіцьця.

3. Культурная спадчына беларускага замежжа.

Сустаршынямі аргкамітэту зьезду абраныя Радзім Гарэцкі, Алена Макоўская, Ніна Шыдлоўская (Беларусь), Хведар Нюнька (Літва), Алег Рудакоў (Расея).

Паказаць камэнтары

XS
SM
MD
LG