Самы рослы
Віктар Януковіч мае багатырскі целасклад. З ростам 1,93 м (паводле розных дадзеных, ад 1,90 да 1,93 м) і вагою парадку 110 кг (паводле іншых дадзеных — да 120 кг) ён выглядае большым за большасьць сваіх калегаў. Сярод прэзыдэнтаў постсавецкіх краінаў ён адчувае сябе «нароўні» хіба што са сваім азэрбайджанскім калегам Гедарам Аліевым і грузінскім — Міхаілам Саакашвілі (абодва па 1,9 м).
Самы доўгаплаваючы
Паводле словаў Віктара Януковіча, кожнай раніцы ён паўгадзіны бегае па дарожцы зь пянькоў у сваёй рэзыдэнцыі ў Міжыгор’і. А потым ідзе ў адкрыты басэйн на тэрыторыі гэтай жа рэзыдэнцыі і праплывае ня менш за 5 км.
Самы вясёлы
Віктор Януковіч часам блытае прозьвішчы, краіны, значэньні словаў і гістарычныя падзеі. Вядомую расейскую паэтку Ганну Ахматаву ён назваў Аннай Ахметавай. Зь лёгкай рукі прэзыдэнта Павел Беспашчадны (паэт з Гарлоўкі) стаў Паўлам Бясьсьмертным. Прэм’ера Канады Стывэна Харпэра ён назваў Хайпэрам, а Чэхава — украінскім паэтам. Замест Баўгарыя ён казаў Беларусь, замест Паўднёвай Асэтыі — Паўночная, замест Косава — Чарнагорыя, Чэхію назваў Чэхаславаччынай, а Ізраіль — эўрапейскай краінай. А яшчэ жыхароў Львову ён назваў найлепшымі генацыдамі краіны (замест генафонду), паблытаў баромэтар з флюгерам, а інвэстыцыйны клімат з надвор’ем. (Па-нашаму, адно «ператряхваньне» з «ператрахваньнем» ураўнаважвае гэтыя ўкраінскія ляпсусы — РС.)
Самы гаспадарлівы
Януковіч прывёў да значнага росту дабрабыту ўкраінскіх алігархаў. У 2010 годзе ва Ўкраіне было 8 мільярдэраў (агульны капітал 21,8 мільярда даляраў), а ў 2011 — 21 мільярдэр (агульны капітал — 58 мільярдаў даляраў).
Самы неўязны
У 2012 Януковіч амаль ня езьдзіў у Эўропу. Калі ў першы год прэзыдэнцтва ён наведаў краіны Эўразьвязу 10 разоў, то летась пабываў там толькі тройчы. (Тут, відавочна, украінскае выданьне зусім не зьвярнула ўвагі на 15-гадовы досьвед прэзыдэнта Беларусі — РС.)
Самы асьцярожны
14 целаахоўнікаў хадзілі зь Віктарам Януковічам па швэйцарскім пасёлку Давас, дзе мясцовая паліцыя і так прачасала ўсё да мілімэтра. У Міжыгор’і, паводле чутак, яго ахоўвае агнявая група супрацьпаветранай абароны. Даходзіць да казусаў: целаахоўнікі Януковіча ў Страсбуры не пусьцілі ў туалет генэральнага сакратара Рады Эўропы, паколькі там знаходзіўся прэзыдэнт Украіны. (Нікому не ўдалося падлічыць, колькі насамрэч целаахоўнікаў суправаджае Аляксандра Лукашэнку падчас ягоных паездак у Альпы. Але, паводле Станіслава Шушкевіча, ахова прэзыдэнта Беларусі перавышае дзьве тысячы чалавек — РС)
Самы дарагалётны
У пачатку 2011 году дзяржаўны бюджэт узяў на сябе выдаткі 7,5 мільёна грыўняў (1 мільён даляраў) на штогадовае абслугоўваньне верталёту Віктара Януковіча. Прэзыдэнт плянуе лётаць па ўсёй Украіне на верталёце AgustaWestland-139 італьянска-амэрыканскай вытворчасьці. (Зноў жа вельмі сумнеўная перавага; у беларускім выпадку маецца ня толькі верталёт, але і два «боінгі» — РС.)
