Лінкі ўнівэрсальнага доступу

У Менску адкрываецца кніжны кірмаш


На кніжным кірмашы ў Менску, 2011 год

На кніжным кірмашы ў Менску, 2011 год

6 лютага ў Нацыянальным выставачным цэнтры «БелЭкспа» адкрываецца ХХ Менская міжнародная кніжная выстава-кірмаш, у якой бяруць удзел прадстаўнікі 25 краін сьвету. Яе дэвіз — «Чытаючы кнігу, знаходзіш сябе».

У экспазыцыі кірмашу будзе прадстаўлены стэнд незалежнага беларускага выдавецтва «Галіяфы», на якім пройдзе шэраг прэзэнтацый. Сярод іх — кнігі Ўладзімера Гніламёдава «На рубеже времён», альбома жывапісу мастака Алеся Родзіна і іншых. Таксама тут будуць наладжаныя аўтограф-сэсіі Анатоля Вярцінскага, Валянціна Акудовіча, Андрэя Федарэнкі, Арцёма Кавалеўскага і Пятра Васючэнкі. Таксама на стэндзе будзе экспанавацца новая карціна Алеся Родзіна «Вока».

Таксама на стэндзе амбасады Польшчы плянуюцца прэзэнтацыі кніг аўтараў, якія ўвайшлі ў лонг-ліст літаратурнай прэміі імя Ежы Гедройца. Сёньня Ўладзімер Някляеў прэзэнтуе кнігу “Аўтамат з газіроўкай з сіропам і без”. Пасьля прэзэнтацый адбудуцца аўтограф-сэсіі на стэндзе выдавецтва “Логвінаў”.

Падчас выставы нямецкая амбасада перадасьць частку прадстаўленых у экспазыцыі на сваім стэндзе кніг у падарунак тром беларускім школам — у Бабруйску, Гомелі і Віцебску. Нямецкі пісьменьнік Нікол Любіч 9 лютага сустрэнецца на стэндзе зь беларускімі школьнікамі. Таксама ў менскім інстытуце імя Гётэ пісьменьнікі Нікол Любіч і Ўладзімер Арлоў прачытаюць свае творы.

На стэндзе амбасады Францыі «Падарожжа» прадстаўнікі парыскай кнігарні «Ля Бушры» пазнаёмяць наведнікаў з сучаснымі кірункамі францускай літаратуры. Гасьцямі стэнда будуць прэзыдэнт «Цэнтру пісьменьнікаў Поўдня Францыі» , ляўрэат Ганкураўскай прэміі Поль Канстан, пісьменьнікі Крысьціян Гарсэн і Луі Сандэрс.

Амбасада ЗША запрашае наведаць свой стэнд «Кнігі, якія вызначылі Амэрыку». Тут будуць прадстаўленыя выданьні, якія зрабілі рашучы ўплыў на сьветапогляд амэрыканцаў і адлюстроўваюць непаўторную літаратурную спадчыну ЗША. Наведнікі змогуць узяць удзел у кампутарнай віктарыне, прысьвечанай амэрыканскай літаратуры.

На выстаўцы пакажуць факсыміле Полацкага Эвангельля 12-га стагодзьдзя, падрыхтаванага выдавецтвам Беларускага экзархату.

У 2017-м годзе спаўняецца 500 год ад выданьня Францыскам Скарынам першай кнігі на беларускай мове. Беларускі бок спадзяецца, што гэта дае магчымасьць Менску прэтэндаваць на статус Усясьветнай сталіцы кнігі 2017 году.

Паказаць камэнтары

XS
SM
MD
LG