Лінкі ўнівэрсальнага доступу

logo-print

У ГОМЕЛІ САНСЛУЖБА ЗАБАРАНЯЕ КАРЫСТАЦЦА ШКОЛЬНЫМІ КАМПУТАРАМІ


Казімер Яноўскі, Гомель

Намесьнік галоўнага лекара гарадзкога цэнтру гігіены Сяргей Асмалоўскі распавёў, што кампутарныя клясы былі апошнім часам пад пільнай увагай. Санслужба мае прэтэнзіі да іх перш за ўсё з прычыны высокага электрамагнітнага поля і высокага электрастатычнага напружаньня, якія зыходзяць ад кампутараў. З гэтай прычыны і зачыняюцца кампутарныя клясы, як не адпаведныя санітарным нормам.

Дырэктар сярэдняй школы №25 Уладзімер Берасьцень, дзе санстанцыя таксама прызнала кампутары шкоднымі для здароўя, паведаміў нашаму радыё.

(Берасьцень: ) “Яны маральна састарэлыя. Гэта кампутары “Карвэты”. Я ўжо 15 гадоў у школе, а яны стаялі яшчэ да мяне. Маімі сіламі нельга нічога зрабіць”, — кажа дырэктар.

Чатыры гады таму ў абласным цэнтры прынялі адмысловую праграму пашырэньня кампутарных ведаў сярод школьнікаў. Прадугледжвалася ў школах і абнаўленьне кабінэтаў інфарматыкі. Аднак за 2001 і 2002 гады школы набылі толькі два малакамплектныя кабінэты інфарматыкі. На большае няма сродкаў.

Бацькі школьнікаў таксама ня ў стане аплаціць кампутарную тэхніку, бо абсталяваньне толькі адной клясы інфарматыкі каштуе каля 10 мільёнаў рублёў.

У сувязі з праверкай кампутарных клясаў санслужбай гарадзкі аддзел адукацыі распарадзіўся перавесьці клясы з найбольш састарэлымі кампутарамі на скарочаны рэжым працы. Іначай навучаньне школьнікаў інфарматыцы трэба было наагул спыніць.
XS
SM
MD
LG