Лінкі ўнівэрсальнага доступу

logo-print

ГОРАЦКІ РАЙВЫКАНКАМ ПАЗБАВІЎ АКРЭДЫТАЦЫІ ЖУРНАЛІСТАЎ МЯСЦОВАЙ НЕДЗЯРЖАЎНАЙ ГАЗЭТЫ “РЭГІЯНАЛЬНЫЯ ВЕДАМАСЬЦІ”


Аляксандар Сердзюкоў, Магілёў

Прымаючы такое рашэньне, кіраўнікі райвыканкаму спасылаліся на закон аб друку. Паводле іхнага меркаваньня, журналісты “Рэгіянальных ведамасьцяў” нібыта знарок скажалі факты і тым самым абражалі гонар і годнасьць службоўцаў.

Супрацоўнікі газэты пісалі пра складанае сацыяльна-эканамічнае становішча, праблемы мясцовых жыхароў, пра няўважлівае стаўленьне да людзей зь боку чыноўнікаў, узгадвалі лічбы, якія дрэнна характарызуюць разьвіцьцё эканомікі. Адным словам, пісалі праўду. Цяпер яны ня могуць зразумець, у чым тут сутнасьць абразы. Тым больш, што ніхто з герояў публікацый не спрабаваў абвергнуць факты праз суд.

Але з гэтага часу журналісты ня змогуць прысутнічаць на нарадах выканкаму і атрымліваць ад чыноўнікаў інфармацыю. Усьлед за рашэньнем выканкаму кіраўнікі горацкага “Саюздруку” адмовіліся распаўсюджваць выданьне ў мясцовых шапіках. Прычыны гэтага рашэньня журналістам так і не растлумачылі.

Газэта друкуецца. Ейны рэдактар Юрый Камзолаў спадзяецца знайсьці агульную мову з уладамі.

“Рэгянальныя ведамасьці” на сёньня ёсьць самым уплывовым у вобласьці рэгіянальным недзяржаўным выданьнем. Ягоныя супрацоўнікі за некалькі гадоў змаглі павялічыць наклад газэты з тысячы да чатырох тысячаў асобнікаў. Газэту чытаюць ня толькі жыхары Горак, але яшчэ ў некалькіх суседніх раёнах.
XS
SM
MD
LG