Лінкі ўнівэрсальнага доступу

logo-print

НА ГОМЕЛЬШЧЫНЕ КАРМЫ НАРЫХТОЎВАЮЦЬ У “ЗОНЕ”


Казімер Яноўскі, Гомельская вобласьць

Рэйд у Веткаўскі раён зьдзівіў нават звыклых да ўсяго супрацоўнікаў адміністрацыі зонаў адчужэньня і адсяленьня Камітэту ў справах Чарнобылю. Тут, на забруджаных тэрыторыях, Гомельскі конезавод №59 разгарнуў сапраўдны мэханізаваны сенакос.

Першыя два трактары з касілкамі рэйдавая брыгада напаткала непадалёк ад выселенай вёскі Бесядзь. Без усялякага дазволу ахоўнікі міліцыі прапусьцілі мэханізатараў у зону. Скасіўшы ні адзін гектар забруджанага травастою, мэханізатары вярталіся дамоў, у Старое Сяло. Яны апраўдваліся, што працавалі ў зоне паводле загаду дырэктара конезаводу Валерыя Жолудава.

Далейшае дасьледаваньне адселенай тэрыторыі выявіла яшчэ больш прыкрыя рэчы. Адразу за радыяцыйным могільнікам працавала яшчэ адна брыгада з конезаводу — чатыры чалавекі й чатыры адзінкі тэхнікі. У сіласную яму проста ў зоне яны пасьпелі закласьці каля 60 тонаў падвяленай травы. Нарыхтоўвалася і сена.

Людзі працавалі без спэцвопраткі, сродкаў індывідуальнай аховы і, канечне, без спэцыяльных пропускаў. Кіраваў нарыхтоўкай кармоў аграном конезаводу спадар Банькоў. Незаконнае пранікненьне ў зону ён патлумачыў проста: дырэктар Жолудаў дамовіўся з раённым начальствам.

Знайсьці кіраўніка конезаводу не атрымалася — ён увесь час у разьездах. У гаспадарцы кажуць, што сёлета толькі сена трэба нарыхтаваць 800 тонаў, бо апроч конефэрмы ёсьць яшчэ каля тысячы галоў буйной рагатай жывёлы.

“Культурных” сенакосаў у гаспадарцы надзвычай мала. Нарыхтоўку забруджаных кармоў у зоне вясковае начальства ня лічыць вялікім парушэньнем — маўляў, там да 1994 году жылі людзі. Дыспэчар конезаводу, які адмовіўся назваць сваё імя, наогул заявіў: “Ну дык што, будзем купляць за даляры і з-за мяжы вазіць сянаж?”

На шараговых нарыхтоўцаў забруджаных кармоў супрацоўнікі адміністрацыі зонаў адчужэньня склалі пратаколы. Хутчэй за ўсё яны атрымаюць штрафы. Якія санкцыі чакаюць дырэктара Жолудава, пакуль невядома.
XS
SM
MD
LG