Лінкі ўнівэрсальнага доступу

logo-print

ГАРАДЗЕНСКІ АКТЫВІСТ МАЛЬЧЫК ВЫЙШАЎ НА ВОЛЮ


Сяргей Астраўцоў, Горадня

Выпусьцілі сп. Мальчыка на некалькі гадзінаў раней, чым міліцыя паведаміла ўсім зацікаўленым. Але ён вярнуўся да Кастрычніцкага райаддзелу міліцыі, каб убачыцца з тымі, хто прыйшоў яго павітаць. Гаворыць Сяргей Мальчык:

(Мальчык: ) “Я, натуральна, вельмі рады, што нарэшце на свабодзе. 10 дзён ізаляцыі. Я быў “невывадны” — ёсьць такая катэгорыя ў прыёмніку-разьмеркавальніку, людзей не выпускаюць з камэры. Адзін раз толькі ў прыбіральню — а 6 гадзіне раніцы. Галоўная праблема, якая там была, гэта холад, таму што адключылі ацяпленьне. І ізаляванасьць ад усяго і ўсіх.

Дзякуй вялікі тым фронтаўцам, якія прыходзілі, прыносілі газэты, прыносілі мінэралку. Адчуваю я сябе нармальна. Ну, вядома, вялікая радасьць, што я нарэшце на свабодзе. Ёсьць слабасьць, ёсьць пэўныя болі ў сэрцы. Але гэта ўсё дробязі”.

Зь Ленінскага райаддзелу міліцыі выпусьцілі Вітаўта Рудніка і Зьміцера Ягорава. Іх пакаралі трыма суткамі арышту за ўдзел у несанкцыянаванай акцыі ў падтрымку журналістаў "Пагоні". Яна адбылася ў мінулую пятніцу. Арыштам пакаралі 6 чалавек. Усе яны знаходзіліся ў адной камэры.

Вітаўт Руднік сказаў мне, што працягвае галадоўку за кратамі Станіслаў Пачобут. Яго арыштавалі на 10 сутак. Выпусьціць павінны ў наступны панядзелак. Арыштаваны на 8 сутак Андрэй Мялешка прымае толькі вэгэтарыянскую ежу.

Пачаўся суд над Юрыем Хадыкам, намесьнікам старшыні БНФ, які выступіў 24 сакавіка перад гарадзенцамі. Гаворыць Юры Хадыка:

(Хадыка: ) “Абвінавачваюць па артыкуле 167-м, частцы першай. Таму максымальна — гэта 10 сутак. Я менавіта хацеў бы, каб былі суткі, калі не папярэджаньне. Таму што дурацкая практыка агромністых штрафаў, яна толькі падтрымлівае ўсю гэтую сыстэму. Я магу сказаць, што пазыцыі міліцыі даволі-такі слабыя. Таму што сьведка адзін, які з боку міліцыі выступаў, ён сказаў, што быў загад арыштоўваць тых, хто выступае. Гэта наагул парушэньне ўсякіх канстытуцыйных правоў чалавека на атрыманьне інфармацыі, абмен інфармацыяй”.

Сёньня ж свой прысуд за ўдзел у акцыі 5 красавіка ў падтрымку журналістаў "Пагоні" павінны атрымаць тры сябры Беларускай асацыяцыі журналістаў. Гэта — Юлія Дарашкевіч, Алеся Сідлярэвіч і Анджэй Кусяльчук.
XS
SM
MD
LG