Лінкі ўнівэрсальнага доступу

logo-print

ПРАФСАЮЗЫ ПРАВЯЛІ АКЦЫЮ ПРАТЭСТУ Ў РАГАЧОВЕ


Казімер Яноўскі, Гомель

У акцыі пратэсту наважыліся ўзяць удзел і прафкамы гандлёвай арганізацыі “Альтаір”, тэрытарыяльнага мэдычнага аб’яднаньня і аграпрамысловага комплексу. Але іх кіраўнікі пасьля напісаньня ў райвыканкам замовы на мітынг нечакана адклікалі свае подпісы. У горадзе мяркуюць, што зроблена гэта было пад уціскам выканаўчых структураў.

А 16 гадзіне на пляцы ля кінатэатру “Прамень” сабраліся пэдагогі гарадзкіх школаў, супрацоўнікі дзіцячых садкоў, рабочыя з мэблевай фабрыкі, пэнсіянэры. Крыху пазней да іх далучыліся рабочыя мясцовага заводу “Дыяпраектар” і дэлегацыя Беларускага мэталюргічнага заводу з Жлобіну.

Удзельнікі мітынгу трымалі лёзунгі: “Саўмін, займайся эканомікай, а не прафсаюзнымі складкамі”, “Зарплату і пэнсіі – на ўзровень цэнаў”. “Мы супраць скасаваньня чарнобыльскіх ільготаў”.

Хаця мітынг быў санкцыянаваны райвыканкамам, аднак дырэкцыя кінатэатру “Прамень” не дазволіла арганізатарам падключыць узмацняльную апаратуру да энэргасілкаваньня. Прамоўцы – старшыня прафкаму “Дыяпраектару” Юры Чурыла, прафсаюзны кіраўнік сярэдняй школы №5 спадар Галоўчанка, мясцовыя мэбельшчыкі і мэталюргі з Жлобіну – вымушаны былі карыстацца мэгафонам.

Усе яны адзначалі: пастанова ўраду №1804 пра адмену безнаяўнага збору складак парушае тарыфныя пагадненьні прафсаюзаў з органамі ўлады, а таксама калектыўныя дамовы паміж наймальнікамі і прафсаюзамі. Усё гэта мае на мэце разбурыць прафсаюзныя структуры.

Пасьля выбараў прэзыдэнта ізноў затрымліваецца заработная плата. А ейны памер не адпавядае росту цэнаў на тавары, прадукты і камунальныя паслугі. Скарацілася дзяржаўная падтрымка ў сацыяльнай сфэры. Напрыклад, установы адукацыі раёну фінансуюцца цяпер зь бюджэту толькі на 60% ад неабходнага.

У рэзалюцыі, якую зачытаў старшыня настаўніцкага прафсаюзу Мікалай Зайцаў, утрымліваецца патрабаваньне тэрміновай адмены пастановы №1804, выказаны пратэст супраць узмацненьня антыпрафсаюзнай накіраванасьці ў палітыцы дзяржавы.

Падтрыманыя таксама высновы агульнагарадзкога мітынгу ў Салігорску, праведзенага ў студзені ў абарону правоў сяброў прафсаюзаў.
XS
SM
MD
LG