Лінкі ўнівэрсальнага доступу

logo-print

СВАБОДНЫ ПРАФСАЮЗ БЕЛАРУСКІ ПАДАЎ ПАЗОЎ НА ГАРАДЗЕНСКІ ГАРВЫКАНКАМ


Сяргей Астраўцоў, Горадня

Амаль год таму Ленінскі суд пастанавіў, што гарвыканкам абавязаны зарэгістраваць арганізацыйную структуру Свабоднага прафсаюзу. Улады выканалі рашэньне толькі напалову. Паставілі суполку на ўлік, але ня выдалі пасьведчаньня. А безь яго немагчыма стаць на ўлік у падатковай інспэкцыі й адкрыць банкаўскі рахунак.

Прафсаюзьнікі паскардзіліся ў суд. І ён пастанавіў прымусіць гарвыканкам. Аднак улады падтрымаў абласны суд. Рашэньне Ленінскага раённага скасавалі. Маўляў, для рэгістрацыі на “Хімвалакне” павінна быць у Свабодным прафсаюзе 10% працаўнікоў, гэта больш за паўтысячы чалавек. На гэта ж спаслаўся ў сёньняшнім рашэньні й судзьдзя раённага суду Анатоль Пракопік.

Кіраўнік прафсаюзнай суполкі Аляксандар Чарней перакананы, што дастаткова трох чалавек. Паколькі мова ідзе не аб рэгістрацыі асобнага прафсаюзу, а толькі ягонай суполкі. Зараз са скаргай давядзецца зьвяртацца ў абласны суд. Хаця там настроеныя супраць Свабоднага прафсаюзу. Тры разы ў раённым судзе разглядалася справа. І трэці раз трэба ісьці ў абласны.

За тры гады змаганьня з “Хімвалакна” звольнілі трох сяброў прафсаюзнай суполкі. Аляксандар Чарней прызнаўся мне, што зволеных можа стаць болей. На прадпрыемстве чакаюць вялікіх скарачэньняў. А ў судзе сёньня выступалі сьведкамі 9 сяброў суполкі Свабоднага прафсаюзу.
XS
SM
MD
LG