Лінкі ўнівэрсальнага доступу

logo-print

ЗАСНАВАЛЬНІК НЕЗАЛЕЖНАЙ ГАЗЭТЫ “РАТУША” Ў МАГІЛЁВЕ ПАДАЎ У СУД НА АДМІНІСТРАЦЫЮ КАСТРЫЧНІЦКАГА РАЁНУ ГОРАДУ


Аляксандар Сердзюкоў, Магілёў

Пасьля непрацяглага разгляду магілёўскі абласны суд вырашыў аб'яднаць дзьве справы ў адну ды накіраваць яе на разгляд суду Кастрычніцкага раёну Магілёва. Судзьдзя мяркуе, што патрабаваньні выдаць даведку пра наяўнасьць юрыдычнага адрасу ў газэты "Ратуша" ды выплаціць матэрыяльную кампэнсацыю на 5 мільёнаў беларускіх рублёў абумоўленыя аднымі і тымі ж абставінамі.

На судзе стала вядома, што газэту "Ратуша" не зарэгістравалі ў Дзяржаўным камітэце па друку з-за адсутнасьці даведкі пра наяўнасьць у яе юрыдычнага адрасу. Заснавальнік выданьня Аляксандар Страх падаў адміністрацыі Кастрычніцкага раёну Магілёва ў якасьці юрыдычнага адрасу сваё жыльлё, але яму адмовілі. Яму патлумачылі, што юрыдычным асобам так выкарыстоўваць кватэру нельга.

Магілёвец нагадаў, што ён ёсьць не юрыдычнай асобай, а прыватным прадпрымальнікам ды зьвярнуўся ў раённы суд . Там адмовіліся разглядаць ягоны пазоў ды параілі спачатку зьвярнуцца ў аблвыканкам, што падштурхнула прадпрымальніка да абласнога суда.

Падобны адказ ён атрымаў у раённым судзе на свой другі пазоў пра матэрыяльную кампэнсацыю маральных стратаў. Як ён заявіў у судзе, да гэтага кроку яго падштурхнуў адказ Лукашэнкавай раённай адміністрацыі на заяву пра рэгістрацыю газэты. На першым паседжаньні абласны суд ня стаў паглыбляцца ў сутнасьць справаў, а адправіў рашэньне таму ж Кастрычніцкаму раённаму суду.

Прадпрымальнік Аляксандар Страх зьбіраецца змагацца да перамогі. Паводле ягонай думкі, "Ратуша" як паветра неабходная жыхарам гораду, бо ў Магілёве выпускаюць толькі дзьве недзяржаўныя газэты — "Дэ-факта" і "Тыднёвік Магілёўскі" накладам ад аднаго да трох тысяч асобнікаў.

Адметна, што заснавальнік назваў газэту, якая праходзіць рэгістрацыю, імем ейнай папярэдніцы. З 1991-га да 1996 году на Магілёўшчыне выходзіла першая мясцовая незалежная газэта "Ратуша", якая за час сваёй дзейнасьці знайшла нямала чытачоў. Аляксандар Страх упэўнены, што цяперашняя "Ратуша" працягне традыцыі сваёй папярэдніцы.


XS
SM
MD
LG