Лінкі ўнівэрсальнага доступу

logo-print

ШВЭДЫ НЯ МОГУЦЬ ДАЦЬ ВЕРЫ, ШТО Ў БЕЛАРУСІ АД ГОЛАДУ ПАДЫХАЮЦЬ ТЫСЯЧЫ СЬВІНЕЙ


Аляксей Дзікавіцкі, Пінск

Швэды ня могуць паверыць, што гэта сапраўды адбываецца ў цэнтры Эўропы.

Пра катастрафічную сытуацыю на сьвінакомплексе “Паўднёвы” радыё СВАБОДА паведамляла яшчэ на пачатку лета мінулага году. Тады праз недахоп кармоў там штодня памірала каля 10 сьвіней. А восеньню трактар вывозіў з фэрмы штодня ўжо каля паўтысячы памерлых жывёлаў.

Я цытую артыкул са швэдзкай газэты Dagens Nuheter. Гаворыць адна з супрацоўніцаў сьвінакомплексу, якая адмовілася называць сваё імя:

“Сьвіньні літаральна крычалі ад голаду. Цяжка было прыходзіць на працу – яны падскоквалі ў паветра, адчайна намагаючыся атрымаць ежу. Некаторы час мы знаходзілі выйсьце ў тым, што сьвіныя тушы варылі ды аддавалі на ежу яшчэ жывым жывёлам. Але на Каляды скончыўся бэнзын, а зь ім і спробы хоць неяк захаваць пагалоў’е”.

Варта адзначыць, што людзі з навакольных вёсак, дзе было добра чуваць галодны енк, прасілі аддаць ім хоць частку сьвіней, але атрымалі адмову. У выніку, калі на пачатку году на “Паўднёвым” было каля 30 тысячаў сьвіней, цяпер засталося ня больш за 6 тысячаў. Памерлых сьвіней кідалі ў ямы зусім недалёка ад комплексу каля кукурузнага поля, не заўсёды нават пасыпаючы зямлёй.

Далей Марыя Сёдэрбэрг піша, я цытую:

«Адзін мужчына, які таксама адмовіўся называць сваё імя, паведаміў, што бачыў, як летам каля дзясятка чалавек, сярод якіх былі і жанчыны, разьмясьціліся ў лесе каля поля з пахаванымі жывёламі. Яны бралі мяса зь ямаў ды прадавалі ў два разы таньней у першую чаргу жыхарам Пінску, якія нічога не падазравалі».

Я запытаўся ў аўтаркі артыкулу, што найбольш уразіла яе ў гэтай гісторыі . Гаворыць Марыя Сёдэрбэрг:

(Сёдэрбэрг: ) «Найбольш мяне шакавала тое, што стаіць па-за афіцыйнай статыстыкай, якую я ўбачыла, прыехаўшы ў Пінск. Афіцыйна было павядомлена, што памерла больш за 30 тысячаў сьвіней. І я пыталаяся ва ўсіх: «Як і дзе гэта магчыма?» Дзіўна, што большасьць пра гэтае нават ня ведалі, а потым аказалася, што сьвінакомплекс зусім блізка каля Пінску!»

(Карэспандэнт: ) «Скажыце, а якая на сёньняшні дзень рэакцыя ў Швэцыі на Ваш артыкул?»

(Сёдэрбэрг: ) «Я атрымала шмат водгукаў – людзі тэлефануюць, дасылаюць і-мэйлы, у якіх кажуць, што ня могуць паверыць, што такое магло здарыцца. Сярод іншых я атрымала водгук ад нашага міністэрства сельскай гаспадаркі – там хутка зьбіраюцца абмеркаваць гэтую інфармацыю. У нас нават немагчыма ўявіць, каб сьвіньні памерлі ад голаду на фэрме, дзе іх мусяць карміць і гадаваць. Цяжка ўявіць таксама тое, што людзі маглі адразаць іхнае мяса і прадаваць на кірмашы. Мушу адзначыць, што вяскоўцы, якія паказалі мне гэта – сапраўдныя героі, і я спадзяюся, што ім раскажуць наколькі важнай ёсьць гэтая інфармацыя дзеля Беларусі і замежжа».

Сказала аўтарка артыкулу Марыя Сёдэрбэрг.

А тым часам, на «Паўдневы» прыяжджалі і працягваюць прыяжджаюць шматлікія камісіі з Пінску, Берасьця, Менску. Зьмяніўся дырэктар, але падзеж працягваеца. Да таго ж тутэйшыя сьцьвярджаюць, што працягвае зьнікаць і мяса з ямаў, дзе хаваюць здохлых жывёлаў.
XS
SM
MD
LG