Лінкі ўнівэрсальнага доступу

ЧАРГОВЫ НУМАР “БРЭСЦКАГА КУР’ЕРА” НАДРУКАВАНЫ ЗА МЯЖОЙ


Алег Супрунюк, Берасьце

Другi раз за 11 гадоў сваёй гiсторыi незалежны штотыднёвiк "Брестский курьер" вымушаны друкавацца за межамi Беларусi. Упершыню гэта адбылося ў 1990 годзе, калi берасьцейскiя камунiстычныя ўлады не далi дазволу на выхад пiлётнага нумару газэты ў родным горадзе. Тады рэдакцыя скарысталася паслугамi друкарнi ў Вiльнi.

Апошнi, 558-ы ад пачатку iснаваньня, нумар "Брестского курьера" надрукаваны сёньня ўначы ў Смаленску. Спачатку са спасылкай на тое, што газэта мае папярэджаньне Дзяржкамдруку, працаваць з гэтым нумарам адмовiлася берасьцейская друкарня. Пасьля, па розных прычынах, аналягiчны адказ яны атрымалі і ад iншых друкарняў Беларусi.

У рэдакцыi "Брестского курьера" ўпэўненыя, што да стварэньня перашкодаў незалежнаму выданьню непасрэднае дачыненьне маюць мясцовыя ўлады. Сытуацыю камэнтуе галоўны рэдактар газэты Мiкалай Аляксандраў:

(Аляксандраў: ) "Яны зарганiзавалi для нас выдатную PR-акцыю. Тое, што яны не далi нам выйсьцi, спрацуе толькi на карысьць "Брестского курьера". Я лiчу, што непасрэдныя заказчыкi ды iнiцыятары гэтых падзеяў знаходзяцца на "верхнiх паверхах" Берасьцейскага аблвыканкаму. Я лiчу, што непасрэднае дачыненьне да гэтага мае старшыня аблвыканкаму Васiль Даўгалёў".

Дзе будзе надрукаваны наступны нумар "Брестского курьера" ў рэдакцыi пакуль ня ведаюць. Ёсьць спадзяваньнi на тое, што выпуск газэты будзе адноўлены ў Берасьцi альбо ў iншым горадзе Беларусi. Калi ж сытуацыя вакол незалежнага выданьня ня зьменiцца, "Брестский курьер" можа зноў выйсьцi за мяжой. Такога разьвiцьця падзеяў рэдакцыя таксама не выключае.

XS
SM
MD
LG