Залунаў небакрай у ружовым сьвітаньні,
Абвяшчаючы небу, што скончана ноч,
За свабоду сваю у суровым змаганьні
Майце гонар і моц!
Майце гонар і моц!
Заірдзее паўнеба крывавым закатам,
Нагрувашчваньне хмар абяцае бяду,
На свабоды шляху пад пагрозаю кратаў
Майце гонар і моц!
Майце гонар і моц!
Намалюе зіма гэты сьвет бела-чорным,
Толькі дзівам здаўна чырвань сьпелых рабін,
Не спужаюць няхай вас дзікунскія жорны,
Майце гонар і моц!
Майце гонар і моц!
Расквітнеюць вясною сівыя аблогі,
І на вогнішчы спаляць зладзеяў сьцягі,
Хай ня зьверне са шляху сьвятло перамогі,
Майце гонар і моц!
Майце гонар і моц!
