Лінкі ўнівэрсальнага доступу

logo-print

БЕЛАРУСКАЙ МАФІІ НЕ ІСНУЕ


Аляксей Дзікавіцкі, Варшава

Паводле інфармацыі прэсавага аддзелу Галоўнай камэндатуры польскай паліцыі, летась сярод замежнікаў, якіх падазраюць ва ўчыненьні злачынстваў на тэрыторыі Польшчы, грамадзянаў Беларусі было 1483. Гэта другое месца пасьля ўкраінцаў.

Як вынікае з паліцэйскіх рапартаў з розных частак Польшчы, злачынцы зь Беларусі ня маюць нейкага вызначанага “поля дзейнасьці”.

Цікавую інфармацыю ў справе злачынцаў з-за мяжы зьмясьціў напярэдадні аўтарытэтны польскі часопіс “Wprost”. У матэрыяле “Імпартаваная мафія” аўтар Яраслаў Кнап дасьледуе этнічныя мафіі, што ўтварылі замежнікі, асноўніыя кірункі і рэгіёны іхнай дзейнасьці.

Паводле аўтара, найбольш моцныя мафіёзныя групоўкі стварылі віетнамцы, якія гандлююць падробленымі таварамі, маюць падпольныя фабрыкі вопраткі і кампакт-дыскаў, а таксама займаюцца нелегальнай перавозкай ахвотных у Заходнюю Эўропу. Альбанцы кантралююць у асноўным гандаль наркотыкамі, а армяне і чачэнцы займаюцца пераважна гандлем жанчынамі й алькаголем.

Украінская мафія мае ў Польшчы штосьці накшталт манаполіі на крадзяжы аўтамабіляў.

Цікава, што сярод этнічных мафіёзных груповак няма беларускай, але ў той жа час беларусаў, якія падазраюцца ў крымінальных злачынствах у Польшчы, амаль ў трыццаць разоў больш, чым, прыкладам, віетнамцаў.

Польская паліцыя мяркуе, што колькасьць злачынцаў той ці іншай нацыянальнасьці залежыць ад агульнай колькасьці наведнікаў з адпаведнай краіны. Летась Польшчу наведала амаль 6 мільёнаў беларусаў, таму, маўляў, столькі крыміналу.

Аднак дасьледчык праблемы, аўтар матэрыялу “Імпартаваная мафія” Яраслаў Кнап упэўнены, што колькасьць арыштаваных залежыць яшчэ і ад таго, маюць прадстаўнікі таго ці іншага народу этнічную мафію ці не. Прыкладам, віетнамская мафія вылучаецца вельмі моцнай дысцыплінай і нягледзячы на сваю актыўную і масавую прысутнасьць у шэрагу сфэраў нелегальнага бізнэсу, віетнамцы вельмі рэдка трапляюць у рукі праваахоўчых органаў. Летась польская паліцыя арыштавала толькі паўсотні віетнамцаў.

Я запытаў у спадара Кнапа: ці ў часе ягоных дасьледаваньняў даводзілася яму чуць пра этнічныя групоўкі беларускіх крымінальнікаў?

(Кнап: ) “Не, беларусы не аб’ядноўваюцца ў закрытыя кляны. З таго што я ведаю, этнічныя мафіі ствараюць пераважна тыя народы, якія ў сваёй краіне маюць радавыя кляны. Як, прыкладам, альбанцы, якія на радзіме таксама жывуць у дастаткова добра зарганізаваных сем’ях”.
XS
SM
MD
LG