Лінкі ўнівэрсальнага доступу

НОВЫ АМБАСАДАР НЯМЕЧЧЫНЫ ФРЫК “ПЕРАПОЎНЕНЫ ІНФАРМАЦЫЯЙ ПРА БЕЛАРУСЬ”


Алена Панкратава, Менск

Спадара Вінкельмана зьменіць спадар Вільгельм Фрык. Прадстаўнікі нямецкіх колаў, якія актыўна супрацоўнічаюць зь Беларусьсю, ужо мелі шэраг сустрэчаў са спадаром Фрыкам і выказаліся наступным чынам: "Гэта вельмі ангажаваны дыплямат".

Паводле словаў аднаго з аналітыкаў, "гэты чалавек больш чым "перапоўнены" інфармацыяй пра беларускую сытуацыю". Вельмі важны момант, на які зьвяртаюць увагу нямецкія палітолягі: за плячыма Вільгельма Фрыка — досьвед працы ў краінах Усходняй Эўропы, а гэта значыць "дакладнае веданьне сацыялістычных мэханізмаў", вельмі неабходнае ў сучасных беларускіх умовах.

Вільгельм Фрык нарадзіўся ў 1939-м годзе ў заходняй частцы Нямеччыны, атрымаў адукацыю юрыста. Фрык зьяўляецца кар'ерным дыпляматам — доўгі час працаваў у Міністэрстве замежных справаў Нямеччыны, па тры гады ў амбасадах Нямеччыны, Румыніі і Польшчы, валодае румынскай і польскай мовамі.

Цяперашняе прызначэньне на пасаду Надзвычайнага і Паўнамоцнага Пасла — самы высокі пункт у ягонай кар'еры. Адначасова гэта таксама і апошняе прызначэньне. Праз тры гады спадару Фрыку будзе 65 гадоў — пэнсійны, паводле нямецкіх законаў век, і ягоная дзяржаўная служба аўтаматычна будзе спыненая.

Нямецкія аналітыкі, якія апошнім часам гутарылі зь Вільгельмам Фрыкам, сьведчаць, што новы амбасадар Нямеччыны ў Беларусі дэманструе сваю поўную пераемнасьць папярэдняй замежнапалітычнай лініі. Гэта ўмацаваньне добрасуседзкіх сувязяў, зыходзячы з умоваў рэальнай палітычнай сытуацыі.

Некаторыя нямецкія аналітыкі называюць Фрыка асобай, блізкай да іншага нямецкага палітыка — Віка. Хаця, у свой час, тое ж самае казалі пра Хорста Вінкельмана. Паводле некаторых іншых дасьведчаных нямецкіх крыніцаў, апошнім часам нямецка-беларускія стасункі атрымалі пэўнае разьвіцьцё менавіта "дзякуючы" Віку. У розных колах яго ўспрымалі больш як нямецкага дыплямата, чым прадстаўніка АБСЭ. Асоба Віка дамінавала, і на гэтым тле актыўнасьць нямецкай амбасады выглядала слабейшай. Як у гэтым зьвязку праявіць сябе спадар Фрык — пытаньне, якое задаюць зараз многія нямецкія аналітыкі.

XS
SM
MD
LG