Тэндэнцыя, прызнацца, сапраўды незвычайная. Учора я згадаў пра тое, што чым далей, тым больш зьяўляецца ў нашай праграме дэбютантаў. Дайшло нават да таго, што гэты тыдзень з “Мэлёдыяй дня” можна было амаль напалову скласьці з запісаў калектываў, якія дагэтуль у нашым эфіры не гучалі. Ды кожнай ягадцы — свой час.
Тым ня менш, і сёньня мы зноў будзем слухаць калектыў, які толькі ў мінулы чацьвер прэзэнтаваў свой дэбютны альбом. Гэта тым больш незвычайна, што лідэр групы “Мадэра гард-блюз” гітарыст Юры Міхайлаў вядомы на беларускай музычнай сцэне ўжо больш за 20 гадоў. Пачынаў ён па сутнасьці зь вядомай кавярні “Сузор’е”, потым захапіўся джазам, працаваў у рэстаранах, дзе займеў сцэнічны ды публічны вопыт.
Праект “Мадэра гард-блюз” склаўся каля двух гадоў таму, у аснове рэпэртуару калектыву — творы аўтарства Юрыя Міхайлава, напісаныя ў традыцыях дастаткова жорсткага, амаль тэхаскага з паходжаньня блюзу, праўда, на расейскай мове. Калектыву пашанцавала на добрага прадусара, які ўклаў грошы ў рэклямную кампанію, касьцюмы, запіс альбому “Кітайская нявеста”.
Менавіта з гэтага альбому паходзіць інструмэнтальная п’еса “Прысьвячэньне Машы”, якую Юры Міхайлаў напісаў у стылістыцы басановы. Прыгожая, крыху лірычная ды сумная мэлёдыя, якая нічым не нагадвае звычайную музыку групы “Мадэра гард-блюз”. Тым больш, спрацуем, як кажуць, на кантрасьце. Ці не таму, як прызнаўся мне прадусар групы Андрэй Осіпаў, менавіта гэтую мэлёдыю й замаўляюць найчасьцей? Што да цяжкага блюзу, дык гэта ад нас не зьбяжыць. Бо мы пачуемся і заўтра!
Зьміцер Падбярэскі