Лінкі ўнівэрсальнага доступу

Песьня “Ручнікі”. Музыка М.Пятрэнкі, словы В.Вярбы. Ансамбль “Песьняры”. Альбом “Песьняры 1“, “Мелодия”, 1971



Рэдка якая песьня пры жыцьці яе аўтараў набывае ранг народнай. Куды хутчэй мінаюць дзесяцігодьдзі, за якімі губляюцца імёны тых, хто напісаў музыку і словы. Мэлёдыя сёньняшняга дня — зь ліку тых, чые аўтары могуць ганарыцца тым, што яны здолелі напісаць сапраўдную народную песьню.

Самадзейны кампазытар Мікола Пятрэнка — аўтар многіх песень, хоць у цяперашняй практыцы хто толькі ні называе сябе кампазытарам! Нават тыя, хто й нотаў чытаць ня ўмее.

Калі Мікола Пятрэнка напісаў на словы паэткі Веры Вярбы песьню “Ручнікі”, ён падсьвядома трапіў літаральна ў “дзясятку”: гэтак арганічна спалучылася ягоная музыка з тэкстам.

Аднак, магчыма, песьня гэтая так і не зрабілася б шырока вядомай нават па-за межамі Беларусі, калі б яна не патрапіла на вочы Ўладзімеру Мулявіну, які ўвёў яе ў рэпэртуар ансамблю “Песьняры”. Тут сказалася яшчэ й сьмелае стаўленьне аранжыроўшчыкаў калектыву да арыгінальных аўтарскіх мэлёдыяў: у выкананьні “Песьняроў” песьня як на той час загучала актуальна і нават модна, актыўна пайшла ў народ аж да таго, што імёны аўтараў неяк неўпрыкмет адышлі на задні плян і практычна забыліся.

Сама ж песьня трывала замацавалася ў рангу клясыкі сучаснай беларускай, і ня толькі, песьні, зь лёгкай рукі “Песьняроў” атрымаўшы мноства новых увасабленьняў. Такім чынам, сёньня можна казаць пра бясспрэчную творчую ўдачу ня толькі аўтараў, але й інтэрпрэтатараў. Пачуемся заўтра!

Зьміцер Падбярэскі
XS
SM
MD
LG