Лінкі ўнівэрсальнага доступу

logo-print

Песьня “Чырвоная ружа”, музыка У.Мулявіна, словы народныя. Ансамбль “Песьняры”. Альбом “Песьняры 2001”, “Ковчег”, 2001



Думаю, ніхто ня будзе спрачацца адносна таго, што мэлёдыю чарговага дня мы выбіраем кожны для сябе з самых розных прычын, аднак найчасьцей — зыходзячы з уласнага настрою. А настрой — такая рэч, кіраваць якой часам надзвычай складана. Вітаю вас!

Канечне, паведамленьне пра аўтакатастрофу, у якую трапіў вядомы музыкант Уладзімер Мулявін, балюча закранула літаральна ўсіх. Што б мы там ні казалі, Мулявін разам зь ягонымі — падкрэсьліваю: менавіта ягонымі “Песьнярамі” — гэта ўжо нешта накшталт сымбалю Беларусі. Як бы мы, кожны з нас, да гэтага калектыву сёньня ні ставіліся.

У кожнай краіне ў кожным зь відаў мастацтва ёсьць асобы знакавыя, якія ўжо пры жыцьці робяцца легендамі. Уладзімер Мулявін — зь ліку менавіта такіх людзей. Здарэньне на шашы на многія дні адцягнула ўвагу мноства людзей ад самых, здавалася б, надзённых і актуальных праблем. І многія з нас задаюцца пытаньнем: а чым асабіста я магу дапамагчы ў гэтай сытуацыі? І кожны гатовы зрабіць тое, што ад яго залежыць.

“Мэлёдыя дня” мае магчымасьць хоць завочна падтрымаць Уладзімера Мулявіна ў такія складаныя для яго дні. Вядома, падтрымаць песьняю, бо я вельмі спадзяюся, што яшчэ неаднойчы здолею пачуць ягоны голас са сцэны.

Музыка Уладзімера Мулявіна, словы народныя, песьня “Чырвоная ружа”. Як казаў герой аднаго зь фільмаў: усё, што магу. Бяз гэтага голасу ўявіць Беларусь сёньня немагчыма. Трымайцеся, Уладзімер Георгіевіч! Мы яшчэ пачуемся!

Зьміцер Падбярэскі
XS
SM
MD
LG