Лінкі ўнівэрсальнага доступу

ВІЦЕБСКІЯ ЎЧАСТКОВЫЯ КАМІСІІ СТВАРАЮЦЬ АДМЫСЛОВЫЯ ГРУПЫ “ДОБРААХВОТНЫХ АГІТАТАРАЎ”


Браніслава Станкевіч, Віцебск

Стварэньне “добраахвотных агітацыйных груп” ёсьць найноўшым віцебскім вынаходніцтвам, упершыню выкарыстаным участковымі камісіямі напярэдадні гэтых мясцовых выбараў.

І паколькі выбарчыя ўчасткі традыцыйна месьцяцца ў школах ды іншых навучальных установах, у лік “добраахвотных агітатараў” найперш трапілі школьныя настаўнікі, якіх прымушае працаваць у вольны час школьная адміністрацыя.

Пра адмысловыя абавязкі, ускладзеныя на “дабраахвотных агітатараў”, або, як іх яшчэ называюць, “добраахвотных памочнікаў выбарчых камісіяў” распавядае настаўніца віцебскай школы №39 Алена Баршчэўская, якая ёсьць таксама незалежным кандыдатам у дэпутаты Віцебскага гарсавету.

(Баршчэўская: ) “Нашым настаўнікам участковыя камісія дае сьпісы выбарцаў ды пасылае праводзіць агітацыю, каб людзі прыходзілі на выбары. Ня мае значэньня, на датэрміновыя ці ў тэрмін, але галоўнае, каб у сьпісе было пазначана, пойдзе чалавек увогуле на выбары ці не! Застаецца толькі здагадвацца, як можна выкарыстаць падобныя зьвесткі…

Я запыталася ў сакратара камісіі, на якой падставе звычайным настаўнікам выдаюцца сьпісы, яны ж не чальцы камісіяў і ня маюць ніякіх правоў… А мне адказалі, што гэта група добраахвотных агітатараў і нават паказалі іхны сьпіс. Там былі прозьвішчы нашых настаўнікаў ды работнікаў домакіраўніцтва.

Пра ўсё гэта я паведаміла ў гарадзкую выбарчую камісію, і там засьведчылі, што я маю рацыю — што ніякіх добраахвотных агітатараў, ніякіх падобных структураў быць не павінна”.

Аднак сёньня такія структуры існуюць, і гарадзкая выбарчая камісія ніякіх захадаў дзеля іхнае ліквідацыі не зрабіла.
XS
SM
MD
LG