Лінкі ўнівэрсальнага доступу

logo-print

У СТАЛІЦЫ ВЫБАРЧЫЯ КАМІСІІ АДМОВІЛІ Ў РЭГІСТРАЦЫІ ПРЫКЛАДНА ПАЛОВЕ АПАЗЫЦЫЙНЫХ ПРЭТЭНДЭНТАЎ НА ДЭПУТАЦКІЯ МАНДАТЫ


Уладзімер Глод, Менск

Да гэтага часу паседжаньні выбарчых камісіяў яшчэ не паўсюль скончыліся. Таму пакуль вядомыя толькі няпоўныя зьвесткі. Але ўчорашняя тэндэнцыя, калі палова прадстаўнікоў апазыцыйных палітычных партыяў ня здолела прайсьці рэгістрацыю, падобна, захоўваецца.

У прыватнасьці, адмову атрымаў кіраўнік незарэгістраванай беларускай Партыі свабоды Сяржук Высоцкі. Камісія палічыла, што ён наўмысна не паказаў у дэклярацыі наяўнасьць гаража. Але, паводле спадара Высоцкага, невялічкі гараж, які на самай справе існуе, належыць не яму, а ягоным бацькам.

Не зацьвердзілі ў якасьці кандыдата і намесьніка старшыні БНФ Юрыя Хадыку. Прафэсар гаворыць пра сяброў камісіі:

(Хадыка: ) “Мая бабка гаварыла: закон, што дышла. А яны нават дрэнны закон кампрамэтуюць. Ну што зрабіць?! Гэта ж, безумоўна, не адпавядае духу закону. Ён уводзіўся, каб выкрываць буйных махінатараў. А яны мяне выкрылі. Я нічога не магу сказаць. Атрымліваў 24 тысячы за рэцэнзію, якая мне была заказаная пры канцы 2001 году. У студзені 2002 году я яе здаў і атрымаў 24 тысячы. Гэта паўадсотка ад майго гадавога заробку”.

Дарэчы, зьвесткі дэклярацыяў аб даходах і маёмасьці сталі вельмі распаўсюджаным абгрунтаваньнем адмовы ў рэгістрацыі. Гаворыць юрыст праваабарончага цэнтру “Вясна” Валянцін Стэфановіч:

(Стэфановіч: ) “Я быў вельмі зьдзіўлены, што якраз большасьць кандыдатаў, якія не былі зарэгістраваныя, зьнятыя з выбарчай гонкі не ў сувязі з тым, што подпісы былі сабраныя зь нейкімі парушэньнямі, а таму, што былі няправільна паказаныя анкетныя зьвесткі і зьвесткі дэклярацыяў. Вельмі шмат такіх выпадкаў. Я асабіста назіраў некалькі вельмі спрэчных момантаў, якія, на маю думку, сьведчаць пра тое, што чалавек паказаў усё правільна, а выбарчая камісія сьцьвярджала, што нейкія дадзеныя ў дэклярацыі несапраўдныя. І на гэтай падставе людзей не рэгістравалі.

Быў цікавы выпадак з прадстаўніком БНФ Шынкевічам у Першамайскім раёне. Ён не ўказаў у дэклярацыі прычэп да машыны. А прычэп рэгіструецца таксама як транспартны сродак у ДАІ. А Шынкевіч пра гэта ня ведаў”.
XS
SM
MD
LG