Лінкі ўнівэрсальнага доступу

logo-print

У СТАЛІЦЫ АПАЗЫЦЫЙНЫЯ ПАЛІТЫЧНЫЯ ПАРТЫІ НЕ ЗМАГЛІ ДАМОВІЦЦА ПРА ПАДЗЕЛ ВЫБАРЧЫХ АКРУГАЎ


Уладзімер Глод, Менск

Напярэдадні выбарчай кампаніі лідэры палітычных партыяў шмат казалі пра неабходнасьць каардынацыі сваіх дзеяньняў, пра новую канфігурацыю кааліцыі і ўзаемныя саступкі. Як цяпер тыя ж самыя лідэры бачаць сытуацыю?

Гаворыць намесьнік старшыні Беларускай сацыял-дэмакратычнай партыі Ўладзімер Нісьцюк:

(Нісьцюк: ) “Каардынацыі такой, каб быў адзіны каардынацыйны цэнтар, каб назіралі за ўсімі акругамі: колькі, як, дзе — няма. Каардынацыя была толькі ў адным — не замінаць адзін аднаму. У нашай партыі ёсьць практычна дамова з камуністамі Калякіна, з партыяй працы Бухвостава, нават з Гайдукевічам дамова ёсьць, што ён будзе вылучаць ва ўсіх акругах, а потым будзе здымаць там, дзе мы зь ім дамовімся. А дамовы, каб усе 55 акругаў накрыць, такой дамовы не было”.

Сакратар управы Партыі БНФ Аляксей Кавалец узгадвае, што на пачатку выбарчай кампаніі лідэры менскіх гарадзкіх арганізацыяў апазыцыйных партыяў зьбіраліся разам.

(Кавалец: ) “Якраз каардынацыя і адбывалася ў нас на офісе з усімі партыямі. Іншая справа, калі пачыналася размова пра канкрэтныя акругі, дык неяк усё заглохла: людзі дзесьці зьнікалі. На гэтым усё спынялася. А потым нейкія абвінавачаньні адзін аднаму, ужо абсалютна нікчэмныя. У прынцыпе ніякай каардынацыі не было. Мы проста засьведчылі, хто па якой акрузе ідзе, і на гэтым спыніліся. А вось калі працэс павінен быў ісьці далей — трэба было думаць, дзе зьняць, куды пераставіць, усё — ужо ніхто не зьбіраўся”.

На думку палітоляга Ўладзімера Падгола, адсутнасьць каардынацыі пры вылучэньні кандыдатаў у дэпутаты ёсьць дрэннай прыкметай. Палітоляг лічыць, што такая разладжанасьць можа захавацца і на іншых этапах выбарчай кампаніі.
XS
SM
MD
LG