Лінкі ўнівэрсальнага доступу

ПАВОДЛЕ ІНФАРМАЦЫІ ЦВК, ГАЛАСАВАЦЬ ДАТЭРМІНОВА ГРАМАДЗЯНЕ НЕ СЬПЯШАЮЦЦА


Валер Каліноўскі, Менск

Датэрміновае галасаваньне, якое многія незалежныя назіральнікі разглядаюць як асноўны мэханізм магчымых фальсыфікацыяў вынікаў выбараў, пакуль ідзе ня надта актыўна. Паводле афіцыйнай інфармацыі ЦВК, у ім узялі ўдзел 5,4% выбарцаў. Найменш актыўна галасуюць у Гомельскай і Гарадзенскай абласьцях — каля 4%, найбольшая колькасьць тых, хто прагаласаваў — у Менскай воласьці — 7,4%.

У Менску, паводле інфармацыі ЦВК, датэрмінова прагаласавалі 6,2% выбарцаў. Старшыня ЦВК па-ранейшаму ня бачыць ніякіх парушэньняў з боку каманды А.Лукашэнкі і яго самога. У гэты панядзелак ЦВК вынесла папярэджаньне Ў.Ганчарыку за бясплатную раздачу незалежных газэтаў з агітацыяй за яго. А вось на тое, што сотні тысячаў асобнікаў спэцвыпуску "Советской Белорусии" бясплатна разьнесла па хатах дзяржаўная пошта, Цэнтарвыбаркам рэагаваць не сьпяшаецца.

Гаворыць Лідзія Ярмошына:

(Ярмошына: ) "Праверка гэтага спэцвыпуску праводзіцца Цэнтрвыбаркамам, пасля праверкі пытаньне будзе разгледжанае на паседжаньні Цэнтральнай камісіі".

Паводле закону, як зазначыла Лідзія Ярмошына, на вывучэньне скаргаў і фактаў парушэньняў ЦВК даецца 10 дзён. Гэта значыць, што іх будуць разглядаць толькі пасьля выбараў. Ці ня будуць увогуле.

Пытаньне аб прадастаўленьні і Ўладзімеру Ганчарыку трохгадзінавага жывога эфіру на дзяржаўным радыё, які меў 4 верасьня Аляксандар Лукашэнка для агітацыі за сябе, ЦВК зьбіраецца разглядаць толькі 8 верасьня — калі што-небудзь зьмяніць будзе ўжо немагчыма.

Вось якім чынам Лідзія Ярмошына аргумэнтавала магчымасьць дадатковага, як і ў Лукашэнкі, апублікаваньня праграмаў апазыцыйных кандыдатаў у дзяржаўнай прэсе:

(Ярмошына: ) "Ну, я прымушу "Советскую Белоруссию" выпусьціць праграмы кандыдатаў нейкім вялікім накладам яшчэ дадаткова — пасьля таго, як газэты "Народная воля", "Беларускі час", "День", "Свободные новості" апублікуюць такім жа накладам і распаўсюдзяць праграму кандыдата ў прэзыдэнты Лукашэнкі".

Спадарыня Ярмошына прызнала, што апытаньне выбарцаў на выхадзе з участкаў, так званы "exit poll", не забароненае выбарчым законам.
XS
SM
MD
LG