Лінкі ўнівэрсальнага доступу

logo-print

НЯГЛЕДЗЯЧЫ НА ЗАБАРОНУ, СТУДЭНТЫ ГОРАЦКАЙ АКАДЭМІІ ПРЫЙШЛІ НА СУСТРЭЧУ З ГАНЧАРЫКАМ


Аляксандар Сердзюкоў, Магілёўская вобласьць

Нягледзячы на агітацыю мясцовага чынавенства, на сустрэчу прыйшло каля 1000 чалавек. Заля акадэміі была запоўненая цалкам. Выступ спадара Ганчарыка суправаджаўся воплескамі. Было бачна, што большасьць удзельнікаў сустрэчы падтрымлівае кандыдата ў прэзыдэнты ад шырокай грамадзянскай кааліцыі.

Праціўнікаў амаль не было, за выключэньнем некалькіх людзей сталага веку, якія пэрыядычна выкрыквалі: "БНФаўцы і Ганчарык прадасьць Беларусь Польшчы!"

На пытаньне: "Ці Вы маральна падрыхтаваліся да паразы на выбарах?" Уладзімер Ганчарык каротка адказаў: "Не, не дачакаецеся. Я ніколі, ні пры якіх абставінах не здыму сваёй кандыдатуры. Гэта будзе падарунак Лукашэнку".

На працягу дзьвюх гадзінаў спадар Ганчарык распавядаў пра сваю перадвыбарчую праграму і адказваў на пытаньні. Паводле ягонай думкі, у Беларусі ёсьць усе магчымасьці для пасьпяховага эканамічнага росту. Для гэтага патрэбна зьмяніць кіраўніцтва. У шматлікіх запісках жыхары Горак заяўлялі пра тое, што пасьля сёньняшняй сустрэчы яны вырашылі аддаць свае галасы за Ўладзімера Ганчарыка.

Улады ўсяляк прымушаюць выбарцаў прагаласавць да 9 верасьня. Як паведамілі жыхары горацкіх студэнцкіх інтэрнатаў, іх прымушалі пайсьці на выбарчыя ўчасткі, пагражаючы ім высяленьнем.

Такія выпадкі не адзінкавыя. Пагрозамі высяліць пужаюць і насельнікаў студэнцкіх і рабочых інтэрнатаў. У Магілёве гэтак прымушалі пайсьці галасаваць кіраўнікі такіх прадпрыемстваў як "Трансмаш" і ліфтабудаўнічы завод. На выбарчыя ўчасткі гоняць і студэнтаў Магілёўскага дзяржаўнага ўнівэрсытэту — таго, дзе вучыўся Аляксандар Лукашэнка.

У размове з карэспандэнтам Беларускай рэдакцыі Радыё Свабода старшыня абласнога штабу Ўладзімера Ганчарыка Надзея Гарохава адзначыла: "У параўнаньні зь іншымі рэгіёнамі, на Магілёўшчыне найбольш часта парушаецца выбарчае заканадаўства. Парушэньні закону набылі масавы характар".

Акрамя патрабаваньня ўзяць удзел у датэрміновым галасаваньні ўлады па-ранейшаму канфіскоўваюць перадвыбарчыя матэрыялы ў падтрымку Ўладзімера Ганчарыка і незалежныя друкаваныя выданьні. Апошнім часам такія выпадкі назіраліся ў Круглым, Клічаве, Быхаве і іншых райцэнтрах Магілёўскай вобласьці.


XS
SM
MD
LG