Лінкі ўнівэрсальнага доступу

ЗВАРОТ ДЗЯРЖСАКРАТАРА ЗША КОЛІНА ПАЎЭЛА З НАГОДЫ 10-Й ГАДАВІНЫ АБВЯШЧЭНЬНЯ НЕЗАЛЕЖНАСЬЦІ РЭСПУБЛІКІ БЕЛАРУСІ


English version: www.usembassy.minsk.by

Дзяржаўны дэпартамэнт ЗША, 25 жніўня 2001 г.

Дэклярацыя 25 жніўня 1991 году, якой Беларусь абвяшчала сваю незалежнасьць ад Савецкага Саюзу, выклікала ў амэрыканцаў надзею і захапленьне.

Мы пабачылі, як Беларусь хутка заняла сваё законнае месца ў Эўропе праз ратыфікацыю дамовы аб скарачэньні і абмежаваньні стратэгічных узбраеньняў, далучэньне да дамовы аб нераспаўсюдзе ядзернага ўзбраеньня і праз вывад са сваёй тэрыторыі ўсёй ядзернай зброі былога СССР; праз актыўны ўдзел у праграме NATO "Партнэрства дзеля міру", а таксама праз сваю палітыку, якая садзейнічала пабудове свабоднай Эўропы з дэмакратычных, напраўду незалежных дзяржаваў.

Мы былі рады падтрымаць беларускі народ, бо ён настойліва працаваў тыя першыя гады пасьля 1991-га дзеля ўмацаваньня незалежнасьці, стварэньня дэмакратычнай палітычнай сыстэмы і вяршынства закону, дзеля аднаўленьня багатай культуры. Беларускі народ праводзіў няпростыя рынкавыя рэформы і працаваў дзеля разьвіцьця адкрытага грамадзтва. Наша падтрымка Беларусі й ейнага народу, што рушылі наперад, адбілася ў кантактах між нашымі краінамі на самым высокім узроўні, уключна зь візытам прэзыдэнта Клінтана ў студзені 1994 году.

Матэрыяльная падтрымка Беларусі дзеля ейнага пераходу да дэмакратыі таксама была і застаецца дастаткова шчодрай. Ад пачатку 1992 году Злучаныя Штаты далі беларускаму народу ў межах дзяржаўных праграмаў і прыватных ініцыятываў больш як 560 мільёнаў даляраў, зь іх больш як 24 мільёны даляраў летась.

Такім чынам, адданасьць Злучаных Штатаў народу Беларусі й ягонай празе незалежнасьці й дэмакратыі застаецца моцнай і нязьменнай. Мы будзем вітаць магчымасьць працягнуць двухбаковыя сувязі ў тым самым рэчышчы.

На жаль, з 1996 году беларускі рэжым фактычна спыніў рух да дэмакратыі і вяршынства закону. Рэжым перасьледаваў грамадзянскую супольнасьць, стала парушаў правы чалавека і абавязацельствы, якія Беларусь прыняла як краіна-ўдзельніца АБСЭ і краіна, якая падпісала Венскую канвэнцыю. Палітыка рэжыму пагоршыла сытуацыю ў эканамічнай сфэры і вытворчасьці, што пацягнула зьбядненьне людзей і пагаршэньне здароўя насельніцтва. Рэжым імкнуўся — бясплённа — разьдзьмуць варожасьць да эўра-атлянтычных арганізацыяў. Іншымі словамі, палітыка рэжыму замінала ЗША і іншым краінам-удзельніцам АБСЭ нармальна і плённа разьвіваць двухбаковыя дачыненьні зь Беларусьсю.

Што трэба, каб вярнуць нашыя двухбаковыя дачыненьні на цьвёрды грунт?

Адказ просты, і мы будзем і надалей даводзіць яго да беларускіх уладаў, грамадзянаў краіны і міжнароднай супольнасьці. Злучаныя Штаты гатовыя аднавіць плённыя двухбаковыя дачыненьні і кантакты на самым высокім узроўні, садзейнічаць больш актыўным зносінам у сфэры палітыкі, гандлю, інвэстыцыяў і ў вайсковай сфэры. Аднак мы гатовыя зрабіць гэта толькі ў тым выпадку, калі беларускія ўлады будуць трымацца стандартаў, якія Беларусь прыняла як удзельніца АБСЭ і член ААН. Гэтыя стандарты, акрамя іншага, прадугледжваюць свабодны, справядлівы і дэмакратычны выбарчы працэс, павагу да грамадзянскай супольнасьці і правоў чалавека, вяршынства закону.

Беларускія ўлады ведаюць пра канкрэтныя захады, якія ім неабходна ўзяць, каб выканаць абавязацельствы перад АБСЭ і каб прызналі вынікі прэзыдэнцкіх выбараў. АБСЭ, Злучаныя Штаты, Эўрапейскі Зьвяз і старшыня Цэнтарвыбаркаму Расеі (нядаўна) паведамілі, што беларускія ўлады мусяць зрабіць, каб выбарчы працэс адпавядаў стандартам АБСЭ.

Калі беларускія ўлады ня возьмуць своечасовых, пасьлядоўных і сур'ёзных захадаў у гэтым кірунку, гэта не заміне нам надалей пашыраць дачыненьні зь беларускім народам. Але адмова ад гэтых крокаў ператворыць існы рэжым у адзінага ізгоя ў Эўропе.

Такім чынам, мы спадзяемся, што беларускія ўлады будуць супрацоўнічаць са сваімі грамадзянамі дзеля вяртаньня іхнай краіны на шлях, на які яна рашуча стала 25 жніўня 1991 году.


XS
SM
MD
LG