Лінкі ўнівэрсальнага доступу

БЕЛАРУСЬ ПЛЯНУЕ ДАЛУЧЫЦЦА ДА ЎСЯСЬВЕТНАЙ ГАНДЛЁВАЙ АРГАНІЗАЦЫІ?


Уладзімер Глод, Менск

Беларусь да гэтага часу ня ёсьць сябрам Усясьветнай гандлёвай арганізацыі (УГА), хаця такое жаданьне беларускія афіцыйныя ўлады выказваюць ужо ня першы год. І толькі ўчора Палата прадстаўнікоў нарэшце ўхваліла два першыя з амаль дваццаці законаў, без прыняцьця якіх немагчыма ўвайсьці ў гэты вядомую ўсясьветную арганізацыю. Што падштурхнула дэпутатаў да гэтага кроку?

Некаторыя дэпутаты клапаціліся: а якія выгады будзе мець Беларусь, калі яна войдзе ва Ўсясьветную гандлёвую арганізацыю? Ці патрэбна ёй гэта? А адзін з дэпутатаў, параўноўваючы Беларусь з гэтай арганізацыяй і бяз яе, выказаўся так: “пакуль мы гуляем у падкіднога дурня, а далучымся да разумнейшых, дык і самі ўзьнімемся да ўзроўню прэфэрансу”.

Як высьветлілася, сёньня трэба хутчэй казаць не пра тыя прыбыткі, што яшчэ будуць, а пра тое, што Беларусь страчвае. З-за таго, што да гэтага часу краіна знаходзіцца па-за бортам Усясьветнай гандлёвай арганізацыі, толькі летась згублена сотні мільёнаў даляраў. Пра гэта афіцыйна заявіў у Палаце намесьнік міністра замежных справаў Беларусі Аляксандар Міхневіч.

(Міхневіч: ) “Сёньня абмежаваньні на тэкстыль супярэчаць нормам УГА. Мы не зьяўляемся сябрам УГА, таму нас штогод “падсаджваюць” на 40 мільёнаў даляраў у краінах Эўразьвязу. Другое – гэта сёньняшнія антыдэмпінгавыя выдаткі, якія мы маем па хлёркалію, іншым хімічным валокнам, ніцям і карбаміду. Гэта “цягне” прыкладна на 100 мільёнаў даляраў”.

Доўгі час, калі згадвалася магчымае сяброўства Беларусі ва Ўсясьветнай гандлёвай арганізацыі, прадстаўнікі ўладаў, у тым ліку і спадар Міхневіч, казалі, што Беларусь войдзе туды выключна разам з Расеяй.

Расею згадвалі і ўчора. Той жа намесьнік міністра замежных справаў. Але ўжо ў іншым кантэксьце.

(Міхневіч: ) “На сёньня на краіны-сябры УГА, пакуль Расея ня стала сябрам УГА, прыходзіцца дзесьці 35-38 працэнтаў нашага таварнага абароту. Заўтра Расея далучыцца да УГА. І гэта будзе 98 працэнтаў! І калі мы маем вакол сябе такое гандлёвае поле і не зьяўляемся сябрам УГА, то мы проста згубім вялікія перавагі, якія дае сяброўства ў УГА”.

Некаторыя дэпутаты, зь якімі я размаўляў у перапынку паседжаньня, ужо, падобна, ня маюць ніякіх ілюзіяў наконт сумеснага з Расеяй далучэньня да Ўсясьветнай гандлёвай арганізацыі. Больш таго, цяпер яны нават кажуць, што гэта была тэза толькі афіцыйнага Менску, а Масква ніколі тут не выяўляла асабліва энтузіязму. А вядомы беларускі эканаміст Леанід Злотнікаў лічыць, што гэтая ідэя была з самага пачатку мёртванароджанай.

(Злотнікаў: ) “Не далей як учора міністар эканомікі Расеі спадар Грэф заявіў пра тое, што Расея скончыла свае перамовы з УГА, і яна будзе гатовая ўступаць у гэтую арганізацыю. Што тычыцца Беларусі, дык нам патрэбна прыняць ня два законы, а зьмяніць усё гаспадарчае заканадаўства. Галоўнае ж – Беларусь ня рынкавая краіна, і таму разьлічваць на сумесны з Расеяй уваход ва УГА ня мае сэнсу. Ніколі мы пры такой эканоміцы не далучымся да УГА!”
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG