Лінкі ўнівэрсальнага доступу

БЕЛАРУСКІЯ ГАНДЛЯРЫ ПРАТЭСТУЮЦЬ СУПРАЦЬ ЭКАНАМІЧНАЙ ПАЛІТЫКІ ЎЛАДАЎ


Міхал Стэльмак, Менск


Сталічныя гандляры сёньня падтрымалі заклік Страйкавага камітэту правесьці аднадзённую акцыю пратэсту. Вось што паведаміў нашаму радыё лідэр прафсаюзнай суполкі прадпрымальнікаў найбольшага ў краіне рынку "Ждановічы" Анатоль Шумчанка:

(Шумчанка: ) "Рэчавы рынак цалкам ня выйшаў на працу. Рэч у тым, што на "Ждановічах" прадпрымальніцтва зрабілася нявыгаднай і рызыкоўнай справай.

Дзяржава праводзіць такую эканамічную палітыку, каб прыбыткі прадпрымальнікаў ад гандлю на рынках пакласьці сабе ў кішэню. У нас падвысіліся як фіксаваныя стаўкі падаткаў, гэтак і арэндныя выплаты.

Людзі ў адчаі, яны даведзеныя да такога стану, што яны гатовыя ісьці на больш жорсткія захады", — зазначыў Анатоль Шумчанка.

У Менску ня выйшлі сёньня на працу й прадпрымальнікі другога па велічыні рынку — "Дынама". У 4 000 гандляроў, паводле словаў прафсаюзнага лідэра гэтага рынку Ігара Намочанкі, тыя самыя праблемы, што і ў іншых.

Фінансавы ўціск з боку уладаў паўплываў і на тое, што акцыю падтрымалі й гандляры меншых сталічных рынкаў. Пратэст мае й прэвэнтыўныя мэты. Дзяржаўны падатковы камітэт абвесьціў пра намер падвысіць неўзабаве на 30% падатак для дробнага бізнэсу, каб зьменшыць бюджэтны дэфіцыт. Гэты тычыцца ўсіх гандляроў.

Тым ня менш, сёньняшняя акцыя пратэсту, паводле папярэдніх зьвестак, не была агульнабеларускай. Частка прадпрымальнікаў, найперш у рэгіёнах, праігнаравала ініцыятыву Страйкавага камітэту. Чаму?

Вось што на гэтае пытаньне адказаў намесьнік старшыні Страйкаму Леанід Каліценя:

(Каліценя: ) "Гэты страйк — першы, які ладзіцца выключна сіламі Страйкаму, без падтрымкі Свабоднага прафсаюзу. У нас паўсталі сур'ёзныя разыходжаньні з кіраўніцтвам менскай рэгіянальнай арганізацыі гэтага прафсаюзу.

Кіраўнікі Свабоднага прафсаюзу адмовіліся ад падтрымкі сёньняшняга страйку і ня выключана, што ў некаторых рэгіёнах яны паспрабуюць яе байкатаваць", — заявіў Леанід Каліценя.

Лідэры прадпрымальніцкіх суполак Свабоднага прафсаюзу насамрэч пацьвердзілі свой няўдзел у акцыі. У прыватнасьці, старшыня менскай рэгіянальнай арганізацыі гэтага прафсаюзу Сяргей Бычкоўскі патлумачыў наступнае:

(Бычкоўскі: ) "Аднадзённыя акцыі з выплатай падаткаў, арэнднай платы за месцы на рынках — гэта неэфэктыўныя мерапрыемствы. Такі страйк мае папулісцкі характар і тлумачыцца палітычнымі мэтамі.

Гэтая акцыя ўвасабляе пазыцыю аднаго чалавека, пад якую дзіўным чынам падганяюцца праблемы прадпрымальнікаў", — мяркуе Сяргей Бычкоўскі.

Гэтым “адным чалавекам”, каму спатрэбілася сёньняшняя акцыя, паводле тлумачэньня прадстаўнікоў Свабоднага прафсаюзу, ёсьць старшыня Страйкаму Валеры Леванеўскі, які мае намер балятавацца на прэзыдэнта Беларусі.
XS
SM
MD
LG