Лінкі ўнівэрсальнага доступу

АБМЯРКОЎВАЕЦЦА ПАШЫРЭНЬНЕ ТРАНЗЫТУ РАСЕЙСКАЙ ЭЛЕКТРАЭНЭРГІІ ПРАЗЬ БЕЛАРУСЬ


Юры Сьвірко, Менск

7 лютага ў Вільні прэзыдэнт канцэрну “Белэнэрга” Яўген Мішук падпісаў з калегамі з Расеі ды трох краінаў Балтыі пагадненьне пра злучэньне энэргасыстэмаў усіх пяці краінаў.

З прычыны існаваньня ў Літве Ігналінскае АЭС фактычна захавалася адзіная старая савецкая энэргасыстэма. Цяпер трэба замацаваць гэта юрыдычна. Ужо створаная рабочая група, якая на гэтым тыдні будзе выпрацоўваць у Менску кампраміснае рашэньне, бо Літва занепакоеная патэнцыйным зацягваньнем яе ў інтэграцыйныя праекты СНД.

Паводле словаў Яўгена Мішука, шэраг літоўскіх палітыкаў выступае супраць энэргетычнага пагадненьня.

(Мішук: ) "Я не палітык, але Літва больш арыентуецца на Захад і на Амэрыку, вы гэта цудоўна ведаеце. Ды й пра NATO йдуць розныя размовы, у тым ліку пра ўступленьне ў Эўразьвяз", — заявіў прэзыдэнт “Белэнэрга”.

Мажліва, менавіта таму ён абмяркоўваў з кіраўніком Адзіных Аб’яднаных энэргасыстэмаў Расеі Анатолем Чубайсам праект будаўніцтва электралініі, якая абмінала б Літву — праўда, праз Польшчу, якая ўжо ў NATO.

(Мішук: ) "Абмяркоўвалі пытаньне паставак энэргіі ды будаўніцтва лініі зь Беларусі ў Калінінград", — зазначыў спадар Мішук і дадаў, што будаўніцтва лініі на 200 кілямэтраў з Горадні ў Калінінград сутыкаецца ў Польшчы зь цяжкасьцямі, бо зямля там прыватная й трэба яе выкупляць.

У будаўніцтве не зацікаўленая й Літва, таму што цяпер яна прадае электраэнэргію ў Калінінград. Ды ня толькі туды — летась Беларусь купіла больш як 700 мільёнаў кіляват-гадзінаў літоўскае электраэнэргіі.

А сёлета “Белэнэрга” купляе ўжо 200 мільёнаў кіляват-гадзінаў штомесяц. Але што найдзіўней:

(Мішук: ) "Там ёсьць яшчэ Расейскае акцыянэрнае таварыства “Аб’яднаныя Адзіныя энэргасыстэмы Расеі” — хоча купіць нібы оптам энэргію ў Літвы й прадаваць нам, але гэта яшчэ ў працэсе перамоваў", — паведаміў Яўген Мішук.

Пры гэтым Анатоль Чубайс адначасова вядзе перамовы з Украінаю пра павелічэньне аб’ёмаў транзыту расейскае электраэнэргіі на Захад ды перамовы зь Беларусьсю пра тое самае, але празь беларускую тэрыторыю.


Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG