Лінкі ўнівэрсальнага доступу

Расейцы пагражаюць спыніць фінансавую дапамогу Беларусі


Уладзімер Глод, Менск

Паводле падлікаў намесьніка дырэктара Інстытута Эўропы Расейскай Акадэміі навук Сяргей Караганава, Расея штогод бязвыплатна перадае Беларусі паўмільярда даляраў. Але цяпер Масква можа спыніць такую дапамогу. Гаворыць Сяргей Караганаў:

(Караганаў: ) “Калі Беларусь ня пойдзе шляхам хутчэйшай прыватызацыі, дык рана ці позна людзі ў Расеі, якія цяпер падтрымліваюць лінію на збліжэньне зь Беларусьсю, вымушаныя будуць спыніць такую падтрымку… Мы ня можам ня бачыць адрозьненьняў паміж эканамікой Беларусі й эканомікай Расеі, якія ўвесь час павялічваюцца. Мы можам казаць колькі заўгодна пра інтэграцыю, але сацыялістычная і капіталістычная эканомікі не інтэгруюцца. Больш за тое, гэта немагчыма”.

З вуснаў расейскіх палітыкаў сёньня прагучалі сур’ёзныя папрокі ня толькі на адрас беларускіх дэпутатаў, але і выканаўчай улады. Расейцы ня могуць зразумець, чаму беларускія ўлады байкатуюць шматлікія прапановы расейскага прыватнага бізнэсу, чаму Расея займае толькі восьмае месца ў сьпісе інвэстараў беларускай эканомікі.

Наколькі рэальныя такія пагрозы з боку Масквы? Ці ня ёсьць гэта толькі чарговым папярэджаньнем, пасьля якога нічога ня зьменіцца? На гэтыя пытаньні адказвае былы кіраўнік беларускага ўраду Міхаіл Чыгір.

(Чыгір: ) “Ёсьць у Расеі такое паняцьце як “паўночны завоз”, які патрабуе велізарных выдаткаў. І ёсьць беларускі завоз, які таксама патрабуе вялікіх бюджэтных стратаў для Расеі. Па-першае, нам даюць зьніжкі на газ штогод на 400–500 мільёнаў даляраў. Па-другое, так званыя тэхнічныя крэдыты, якія на самой справе ніколі для Расеі ня вернуцца. У Расеі ёсьць свае праблемы і яны хочуць, у першую чаргу вырашаць іх, а не беларускія. Калі зьмяненьняў ня будзе, дык Расея будзе фінансаваць Беларусь пастаянна — ці то ў саюзе, ці то без саюзу”.

На прэсавай канфэрэнцыі кіраўнік расейскай дэлегацыі Ўладзімер Лукін і Сяргей Караганаў зноў нагадалі пра неабходнасьць хуткіх зьменаў у Беларусі. У прыватнасьці, спадар Караганаў сказаў, што ў 1996 годзе меншасьць расейцаў выступала супраць прэзыдэнта Беларусі. Цяпер жа колькасьць жыхароў Расеі, якім не падабаецца Лукашэнка, павялічылася.

А Ўладзімер Лукін сказаў, што, на ягоны погляд, лёзунг “Беларусь з Расеяй — разам у Эўропу” больш патрэбны Беларусі, чым Расеі.
XS
SM
MD
LG