Лінкі ўнівэрсальнага доступу

logo-print

Новым кіраўніком Беларусі можа стаць адстаўны генэрал КГБ


Кастусь Бандарук, Прага

Гэта пераможны для Расеі канец інтрыгі вакол інтэграцыі дзьвюх дзяржаваў. Пуцін катэгарычна адкінуў навязваны яму Лукашэнкам варыянт канфэдэрацыі. Расейскі кіраўнік даказаў, што ён не кіруецца савецкай настальгіяй і яго не задавальняюць пустыя фразы пра былое братэрства рэспублікаў. Лукашэнка прыгразіў павярнуцца на Захад, але Лукашэнка Захаду не патрэбны, затое патрэбная Расея – як саюзьнік у барацьбе зь міжнародным тэрарызмам. У такой сытуацыі, піша Ігар Бунін, беларускі лідэр прайграў: яго нават не пусьцілі ў Прагу, і ў такіх умовах яму заставалася адзінае выйсьце: паўзьці на жываце да Пуціна, што ён і зрабіў.

“Независимая газета” цытуе выказваньні расейскіх аналітыкаў пад агульным загалоўкам “Расея скончыла з крывадушніцтвам”. На думку сябры навуковай рады маскоўскага Цэнтру Карнэгі Аляксея Малавічэнкі, “вялікая заслуга Пуціна ў тым, што ён паказаў Лукашэнку ягонае месца, і ўсе гульні зь беларуска-расейскім адзінствам-закончыліся. Гэткім чынам Расея заявіла, што для яе прыярытэтам зьяўляюцца ейныя нацыянальныя інтарэсы. Кіраўнік расейскага Цэнтру стратэгічных дасьледаваньняў Андрэй Піянткоўскі лічыць, што скончыўшы з крывадушніцтвам, Расея адкрывае шлях да нармальных, сяброўскіх адносінаў зь Беларусьсю, якія будуць разьвівацца, верагодна, ужо пры іншым беларускім лідэры.

Віталь Цэпляеў у “Аргументах и фактах” таксама адзначае, што калі ЗША і Эўразьвяз абвясьцілі Аляксандра Лукашэнку “пэрсонай нон-грата” на сваёй тэрыторыі, яму не заставалася нічога іншага, як мірыцца з Крамлём. Аднак, паводле Цэпляева, ўземаразуменьне ў Валынскім – уяўнае. Хаця днямі Лукашэнка заявіў аб гатоўнасьці балятавацца на трэці тэрмін, аднак, паводле некаторых дадзеных, у Расеі ўжо шукаюць ягонага пераемніка. Адна з кандыдатураў – беларус па нацыянальнасьці, былы генэрал КГБ Савецкага Саюзу, які зараз працуе ў адной з расейскіх камэрцыйных структураў.

На старонках “ Нового времени” Вадзім Дубноў аналізуе прычыны, дзеля якіх Беларусь апынулася сярод краінаў-ізгояў. Паводле аўтара, Лукашэнка зьдзівіў Захад нават болей, чым усе дыктатары на Балканах, у Цэнтральнай Азіі і на Блізкім Усходзе. Ён адзін узнавіў у цэнтры Эўропы стыль кіраваньня эўрапейскіх дыктатараў сярэдзіны 1930-х гадоў, з чырвоным сьцягам эпохі разьвітага сацыялізму.

На думку Вадзіма Дубнова, незважаючы на ваяўнічыя заявы Лукашэнкі, Беларусь – не Паўночная Карэя, і яна ня можа сабе дазволіць ізаляцыю. Зараз абсалютна ясна, што з прычыны неэфэктыўнасьці сваёй эканомікі, агульнай слабасьці рэжыму і ізаляцыі на эўрапейскай прасторы Беларусь ператварылася ў нявольніка Расеі. Лукашэнка больш не самастойны гулец на беларуска-расейскай палітычнай сцэне, – канстатуе Вадзім Дубноў на старонках “Нового времени”.
XS
SM
MD
LG