Грузінскі прэзыдэнт Міхаіл Саакашвілі сёньня заявіў пра пачатак ўз’яднаньня Грузіі пасьля таго, як лідэр Аджарыі Аслан Абашыдзэ пайшоў у адстаўку і пакінуў краіну. Міхаіл Саакашвілі зьвярнуўся да дэманстрантаў на вуліцах Батумі, якія сьвяткавалі адстаўку Абашыдзэ. Ён назваў кіраваньне Абашыдзэ дыктатурай:
“Гэта была сапраўдная дыктатура, якую вельмі мала ўспрымалі ў сьвеце ў такой якасьці. Абашыдзэ быў асобай, які ўціскаў людзей – у пэўным сэнсе такі міні- Садам Хусэйн. Я маю на ўвазе, што ён меў усе атрыбуты сапраўднай дыктатуры.”
--сказаў М. Саакашвілі.
Былы лідэр Аджарыі Аслан Абашыдзэ паляцеў у Маскву пасьля перамоваў з кіраўніком Рады Бясьпекі Расеі Ігарам Івановым, які дапамог у мірным вырашэньні крызісу.
Адстаўка Абашыдзэ, які кіраваў Аджарыяй 14 гадоў, сталася першым крокам да аднаўленьня цэнтральнага кіраваньня над усёй тэрыторыяй Грузіі. Цяпер Тбілісі хоча аднавіць кантроль над іншым рэгіёнам -- Паўднёвай Асэціяй.
Прадстаўнік Дзярждэпартамэнту ЗША Рычард Баўчэр заявіў, што “ЗША вітаюць мірнае аднаўленьне ўлады Тбілісі”. Саакашвілі ўвёў у Аджарыі прэзыдэнцкае кіраваньне.
Грузінскі прэм’ер Зураб Жванія сёньня заявіў у Батумі, што цэнтральны ўрад Грузіі будзе паважаць аўтаномны статус Аджарыі. Ён паведаміў, што ў хуткім часе ў рэгіёне будуць праведзеныя парлямэнцкія выбары.